Kompania Kosovare për Distribuim të Energjisë (KESCO) ka njoftuar se prodhimi i energjisë elektrike nga KEK-u vazhdon të jetë i kufizuar, me vetëm njësi që është duke prodhuar rrymë.
Sipas njoftimit për media të shtunën, KESCO bëri të ditur se kërkesat e konsumatorëve për energji elektrike janë duke u mbuluar përmes importit.
“KESCO njofton publikun se prodhimi vendor i energjisë elektrike vazhdon të jetë i kufizuar. Njësia A3 është duke prodhuar rreth 110 megavatë sot, ndërsa pjesa tjetër e kërkesës do të mbulohet përmes importit të energjisë. Në të njëjtën kohë, konsumi i përgjithshëm ka shënuar rritje gjatë ditëve të fundit, kryesisht për shkak të përdorimit më të madh të kondicionerëve si pasojë e temperaturave të larta. Për të siguruar furnizim të qëndrueshëm dhe pa ndërprerje, KESCO ka siguruar importet e nevojshme nga tregjet ndërkombëtare dhe po vazhdon të punojë intensivisht për të përmbushur nevojat në rritje për energji”, thuhet në njoftimit e KESCO-s.
KESCO ka bërë thirrje për kursim të energjisë.
“I bëjmë thirrje të gjithë konsumatorëve që të ndihmojnë në kursimin e energjisë, veçanërisht përmes përdorimit më efikas të pajisjeve për ftohje. Çdo kilovat-orë i kursyer ndihmon në lehtësimin e ngarkesës në sistem dhe ul koston e përgjithshme të energjisë — duke përfituar të gjithë nga kjo”.
KESCO kishte njoftuar dje se ditëve në vazhdim rryma do të importohet për shkak të rënies së KEK-ut, megjithatë një njoftim i tillë ishte demantuar nga korporata më e madhe në vend.
Sipas KEK-ut, njësitë e termocentraleve Kosova A dhe Kosova B po përballen me defekte teknike “të paplanifikuara dhe të vështira për t’u parashikuar me saktësi”.
