Marketet në vendin tonë kanë qenë dhe vazhdojnë të jenë cak i vjedhjeve dhe grabitjeve, ku hajnat arrijnë të kapin para apo gjësende ushqimore. Raste të shumta kanë ndodhur në pikat e rrjetit të Viva Fresh në plot qytete. Përveç humbjeve, plaçkitjet po shkaktojnë pasiguri si për punëtorët ashtu edhe për klientët, raporton Gazeta Sinjali.
Një rast i vjedhjes është raportuar në një prej marketeve “Viva Fresh” në Prishtinë, ku një person ka përvetësuar produkte ushqimore, por është identifikuar falë kamerave të sigurisë dhe është arrestuar nga Policia.
Burime të Gazetës Sinjali bëjnë me dije se rasti është iniciuar më 05 maj, pas deklaratës së E.D, menaxhere në marketin në rrugën “Bajram Bahtiri”. Ajo kishte vërejtur mungesë në stok dhe, pas rishikimit të pamjeve të sigurisë, kishte konstatuar se më 02 maj, një person kishte marrë disa produkte ushqimore pa i paguar.
Pas identifikimit, sot është siguruar prezenca e të dyshuarit Mentor Konjusha, i cili është intervistuar në prani të avokatit mbrojtës.
Me urdhër të prokurorit kujdestar, i dyshuari është dërguar në mbajtje, ndërsa rasti është duke u trajtuar nga hetuesia kompetente për veprën penale “Vjedhje”.
Shënim: Personat e apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
