Dikur njiheshin si “Brezi i Republikës” brenda Lidhjes Demokratike të Kosovës, por sot janë në pozicione të ndryshme politike e institucionale.
Por në fund “miqësia e kahmotshme” nuk kishte krijuar distancë mes tyre, së paku tek njëri prej tyre i cili iu gjend pranë “shoqes” së tij atëherë kur më së shumti kishte nevojë.
Kështu mund të përshkruhet thënë më së buti raporti mes Vjosa Osmanit dhe Lumir Abdixhikut, e para sot presidente e i dyti kryetar i LDK-së, parti të cilën Vjosa Osmani nga piedestali arriti ta fundos në oqeanin politik, madje shumë metra thellë ku nuk shihej as drita e diellit.
Raporti mes tyre i kahmotshëm, por kulmin e arriti kur Vjosa Osmani arriti të marrë “aminin” e LDK-së si kandidate për kryeministre në zgjedhjet parlamentare të vitit 2019, kur nuk arriti për pak t’i fitojë ato, pasi Albin Kurti si i vetëm arriti ta mposhtë “Brezin e Republikës” së LDK-së.
Kurti do të bashkëpunonte me të dy, Osmanin e Abdixhikun, të parën do ta votonte si kryetare të Kuvendit e të dytin do ta bënte ministër për të cilin kishte fjalë glorifikuese.
Por ky bashkëpunim shumë shpejt do të merrte fund, pasi Kurti ia solli “punën” LDK-së që të dalë nga koalicioni përmes shkarkimit të atëhershëm të ministrit Agim Veliu.
Pavarësisht rrjedhave politike të asaj kohe raporti Osmani – Abdixhiku mbetej i palënduar, sado që lëvizjes ishin të mëdha.
Fillimisht Vjosa Osmani do të largohej nga LDK për të formuar një parti politike “Guxo”, duke iu bashkangjitur Kurtit në garën zgjedhore të zgjedhjeve të 14 shkurtit 2021, kurse Abdixhiku do të vazhdonte të rrinte në LDK, me synim të qartë për ta marrë drejtimin e saj.
Aleatja politike e Abdixhikut brenda LDK-së, Vjosa Osmani, do të arrinte që bashkë me Albin Kurtin ta fundoste LDK-në nga partia e dytë në vend në pak mbi 12% në zgjedhjet e 14 shkurtit 2021.
E kjo situatë i hapi rrugë Lumir Abdixhikut që në mars 2021 të zgjedhej kryetar i LDK-së.
Por pavarësisht që Vjosa Osmani ia kishte fundosur politikisht partinë që tash udhëhiqte, Lumir Abdixhiku ishte sërish aleati politik i Vjosa Osmanit, për të cilin ajo kishte nevojë që të arrinte kulminacionin në karrierën e saj politike, të zgjedhej presidente e Republikës.
E zakonisht “dakordimi” në heshtje doli në pah sërish, pasi kryetari i LDK-së kishte vendosur që t’ia mundësojë Vjosa Osmanit të zgjedhet presidente duke ia bërë kuorumin në Kuvend, pasi për zgjedhjen e presidentit duhen të pranishëm së paku 80 deputetë.
Nga shumëkush ky vendim i Lumir Abdixhikut konsiderohej si një “argat” në shërbim të aleates së tij politike, me shpresë që Osmani do t’ia kthente dikur.
E sot, si asnjëherë tjetër kthimi i shërbimit për Abdixhikun është i nevojshëm, por duket se po ndodh pikërisht ajo që parashikohej nga shumë njohës, Vjosa Osmani nuk do t’ia dijë fare për Lumir Abdixhikun pasi ka shfrytëzuar maksimalisht atë.
Ishte fare lehtë e parashikueshme që Vjosa Osmani do ta “tradhtonte” Abdixhikun, ashtu siç bëri me shumë aleatë politik më herët.
LDK duket se ka shpresuar që “Guxo” e Vjosa Osmanit do ta mbështeste në këto zgjedhje, por partia e krijuar nga Vjosa Osmani në fund hyri në koalicin të sërishëm me Vetëvendosjen, e presidentja vazhdon të mos bëjë zë karshi politikës së Albin Kurtit, sidomos në raport me partnerët perëndimor.
Ajo duket se nuk ka vullnetin ta ndihmojë sadopak Lumir Abdixhikun, i cili ia mundësoi zgjedhjen presidente para rreth 4 vitesh.
A po del Vjosa Osmani edhe njëherë “tradhtare” politike?
Këtë mbetet ta vlerësojnë vet qytetarët e Kosovës!
