Presidenti i Serbisë, Aleksandar Vuçiq, deklaroi se priste marrëdhënie të mira me SHBA-në pas fitores së republikanit Donald Trump në zgjedhjet presidenciale të 5 nëntorit.
Duke iu përgjigjur pyetjeve të gazetarëve në një konferencë për shtyp me kryeministrin çek Petr Fiala në Pallatin e Serbisë në Beograd, Vuçiq tha se Serbia kishte arritur të mbajë marrëdhënie të mirë me Trump pas mandatit të tij të parë presidencial, raportojnë mediat serbe, përcjell Insajderi.
“(Kjo është) një situatë pak më e favorshme për ne, por nuk do të ketë ndryshime tektonike”, tha ai.
Ai vuri në dukje se do të presë presionin e SHBA-së për bashkëpunimin e Serbisë me Kinën, e cila sipas tij shihej nga Uashingtoni si “kundërshtar strategjik në skenën globale”.
Ai shtoi se pret që lufta në Ukrainë të merrte fund pas fitores së Trump.
