Përgjatë një jave, në Kuvendin e Kosovës u mbajtën katër seanca, tri të fundit ishin të jashtëzakonshme. Të parën, që ishte vazhdim i seancës plenare, e lëshoi opozita pasi nuk kaloi kërkesa e tyre për debat parlamentar për bisedën mes Mimoza Kusarit dhe Milan Radojçiqit. Ndërsa tri të jashtëzakonshmet u mbajtën pa partinë më të madhe. Në mungesë të VV’së, Kuvendin e drejtuan nënkryetari nga radhët e PDK’së, Enver Hoxhaj, dhe ai nga LDK, Kujtim Shala.
Më pak se katër muaj kanë mbetur nga mbajtja e zgjedhjeve parlamentare. Ende pa u përfunduar mandati, deputetët e pozitës dhe opozitës kanë krijuar ngërç në Kuvend. Kjo pasi në katër seancat e fundit nuk qenë prezentë dy palët.
Në seancën e 10 tetorit opozita shkoi me kërkesën që të aprovohet debati parlamentar për bisedën e publikuar mes shefes së Grupit Parlamentar të VV’së, Mimoza Kusari- Lila, dhe kryeterroristit të Banjskës, Milan Radojçiq.
Pasi VV votoi kundër dhe votat pro nuk mjaftuan që të kalojë kjo kërkesë, partitë opozitare lëshuan sallën e kuvendit. Shefi i Grupit Parlamentar të LDK’së, Arben Gashi, atë ditë tha se do të koordinohen për “veprime të mëtutjeshme”.
“Pas kësaj situate të krijuar e konsiderojmë të paarsyeshme që ne të vazhdojmë të jemi pjesë e kësaj seance, të shkojmë të koordinohemi për veprimet e mëtutjeshme”, tha ai.
Për të nesërmen (11 tetor) opozita thirri seancë të jashtëzakonshme për të njëjtën çështje. Aty mungoi Lëvizja Vetëvendosje dhe drejtimin e seancës e mori Enver Hoxha i PDK’së.
Në këtë seancë PDK prezantoi një rezolutë ku kërkohet nga Prokuroria e Shtetit të iniciojë hetim penal ndaj Mimoza Kusari- Lilës dhe shkarkimi i saj si shefe e GP të VV’së. Në mungesë kuorumi, kjo rezolutë nuk u miratua.
Seanca tjetër e jashtëzakonshme u thirr për të hënën (14 tetor) me qëllimin për të diskutuar rreth çështjes së ushqimit në Forcën e Sigurisë së Kosovës.
Para se të nisë seanca, deputeti i VV’së, Enver Dugolli, në një konferencë për media ka thënë se nuk do të marrim pjesë në asnjë seancë të thirrur nga opozita derisa ata “të reflektojnë”.
“Tentimi për të diktuar apo shantazhuar grupin tonë parlamentar për shkarkimin e zonjës Mimoza Kusari- Lila si shefe e GP si kompensim i pjesëmarrjes në seanca dhe votimeve në këtë legjislaturë, është absurd, për të cilin ne nuk e pranojmë. Ne as nuk përzihemi se kë e votojnë ata për shefa GP të tyre e aq më pak të pranojmë kushtëzime të tilla për shefen e Grupit tonë Parlamentar. Si rrjedhojë ne nuk marrim pjesë në asnjë lloj seancë apo iniciative që vie nga ana e tyre derisa ata nuk reflektojnë dhe të shmangin këtë formë imponimi i cili nuk kalon”, tha ai.
Edhe në seancën e 14 tetorit, që e drejtoi Enver Hoxhaj, për shkak të mungesës së kuorumit, dështoi të votohet rezoluta e opozitës për ushqimin e FSK’së.
“Kuvendi i Republikës së Kosovës kërkon nga Qeveria, Ministria e Mbrojtjes që me urgjencë ta zgjidhë çështjen e furnizimit me ushqim si dhe me të gjitha pajisjet tjera të nevojshme. Zyrtarët përgjegjës në Ministrinë e Mbrojtjes duhet të japin dorëheqje. Ministri i FSK-së, zëvendësministri, sekretari i përgjithshëm dhe e gjithë hierarkia përgjegjëse në administratën e Ministrisë. Kërkohet nga Prokuroria e Shtetit që të hapet procedurë ligjore për të hetuar rastin, duke përfshirë edhe dyshimet për FSK-në për çështje që kanë të bëjnë me interesa korruptive”, thuhej në rezolutë.
Një seancë e jashtëzakonshme u mbajt edhe sot, të cilën fillimisht e drejtoi Enver Hoxhaj e më pas Kujtim Shala. Kjo për dy çështje: për faljen e borxheve të ambalazhuesve të ujit dhe bisedat e publikuara mes Dejona Mihalit me Nagip Krasniqin dhe mes Mimoza Kusari- Lilës me Igor Simiqin.
Edhe në këtë seancë mungoi Vetëvendosje, derisa opozitarët mbajtën fjalime për rreth 2 orë.
