Sot, më 3 Maj në Ditën Botërore të Lirisë së Shtypit, Asociacioni i Gazetarëve të Kosovës vlerëson se gazetarët në Kosovë vazhdojnë të mbesin target i sulmeve.
Në këtë ditë, AGK deklaron se gazetarët në Kosovë vazhdojnë të përballen me një numër sfidash në kryerjen e punës së tyre.
“Kryesorja mbetet një fushatë e pandalshme nga ana e Qeverisë së Kosovës dhe partisë politike në pushtet, Lëvizja Vetëvendosje, në përpjekje për të delegjitimuar punën e gazetarëve. Gazetarët dhe mediat mbesin cak i sulmeve nëpërmjet fjalorit denigrues që ka për qëllim uljen e besimit të publikut në raportimin e tyre”, thekson AGK.
AGK-ja i bën thirrje Qeverisë në detyrë, Lëvizjes Vetëvendosje dhe gjithë akterëve politikë që të respektojnë dhe të mos e pengojnë punën e gazetarëve, si faktor kyç në zhvillimin demokratik të vendit.
“AGK-ja shpreh shqetësim që shumica parlamentare, në një procedurë të shpejtë dhe të komprometuar, ka zgjedhur anëtarët e bordeve të Radio Televizioni i Kosovës dhe Komisioni i Pavarur i Mediave, që ka rezultuar, siç kemi paralajmëruar, në tendencë të hapur për kontrollimin politik dhe partiak të të dyja institucioneve”, vijon reagimi i AGK-së.
https://www.facebook.com/share/p/1CgFHX846k/?mibextid=wwXIfr
