Super-tifozja kineze, Zhang Jiao, pasi e realizoi ëndrrën e saj për ta parë Lionel Messin duke e ngritur lart trofeun e Kupës së Botës, thotë se tash e tutje çdo ndeshje që do ta luajë ylli argjentinas do të jetë “e çmuar”.
Zhang udhëtoi nga Shanghai për në Pekin këtë javë për t’iu bashkuar turmës së tifozëve të Messit derisa kapiteni i Argjentinës erdhi në këtë qytet për ta zhvilluar ndeshjen miqësore me Australinë.
“Për fansat e Messit, ju duhet ta shijoni vërtet kohën e mbetur”, thotë fillimisht për “Reuters” tifozja Zhang, e cila është ende në kërkim të biletës për ndeshjen e sotme, përcjell “Gazeta Express”.
“Është vetëm një ndeshje miqësore, kështu që nuk ka shumë garë në të. Kështu që, përse do të duhej të vija në Pekin këtë radhë? Çdo mundësi për të ardhur këtu, ta shoh atë duke luajtur, është e vlefshme, e çmueshme, sepse ju e dini se ka mbetur edhe pak kohë (deri tek pensionimi)”.
Derisa ishte në universitet në Shanghai, ajo e kishte mundësinë ta shihte 35 vjeçarin në Botërorin e tij debutues në vitin 2006.
Ajo e përcolli me vëmendje karrierën e shtatë herë fituesit të Topit të Artë, me qindra ndeshje të tij në televizor duke u zgjuar në gjysmë të natës për ta parë atë derisa luante në Barcelonë e më pas në Paris Saint-Germain.
Zhang kishte udhëtuar edhe në Argjentinë për ta parë Messin duke luajtur, por edhe në tre Botërorët e tij të fundit.
Ajo e vizitoi manastirin e Tibetit vitin e kaluar para Kupës së Botës për t’u lutur që dëshira e tij më e madhe të bëhej realitet, që Argjentina të fitonte në Katar.
Dhe, ajo i shikoi shtatë ndeshjet e Messit në tribuna në Katar, përfshirë këtu edhe finalen ndaj Francës.
“Ndjenja ishte që më nuk kisha merake në jetën time.”
“Ishte definitivisht kulminacioni i jetës sime pas shumë vitesh, sepse nuk e realizova vetëm unë ëndrrën, por edhe Messi. Pra, e shijova këtë ëndërr të dyfishtë.”
Derisa po qëndron në barin artificial të vendosur për shumë tifozë kinezë me fanellat e Argjentinës, këtë moment të veçantë po e shijon edhe Zhang, përcjell “Gazeta Express”.
Përcjellja e ndeshjeve të Messit ia ka mundësuar asaj të udhëtojë përreth botës, të takojë njerëz, të bëjë miq, të ndajë eksperienca, ndërsa ndien se kjo e ka bërë person më pozitiv.
“Ndiej se Messi mund t’jua japë një lloj fuqie. Unë ndoshta e kam pasur një periudhë të mërzitshme, frustruese apo kohë të keqe në punë, por së paku këtë radhë së paku mund të ndihesh se ende ke diçka që e do”, vazhdoi Zhang, e cila punon në menaxhment të konsultimeve dhe në kompani të internetit.
Messi, 35 vjeç, po shkon drejt fundit të karrierës ndërsa së fundmi iu bashkua klubit amerikan, Inter Miami.
Zhang shpreson që ai të luajë sa më gjatë të jetë e mundur, edhe pse dyshon që ai do të jetë pjesë e Botërorit 2026.
“Një ditë ai do të pensionohet dhe unë vetëm mund të them se në atë ditë, unë do t’i kthehem kohës ngadalë për ta kujtuar karrierën e tij të gjatë, e cila më solli aq shumë lumturi, aq shumë momente të lumtura. Do t’i jem mirënjohëse dhe falënderuese atij”, përfundoi super-tifozja kineze Zhang Jiao. /Gazeta Express/
