Al-Hilal ka bërë ofertën e parë për transferimin e Kylian Mbappes.
Eksperti i transferimeve, Fabrizio Romano, ka njoftuar se klubi saudit ka dorëzuar ofertën e parë zyrtare te Paris Saint-Germaini në mënyrë që të nisë bisedimet për yllin francez, shkruan Gazeta Express.
Oferta thuhet se ka vlerën e 300 milionë eurove, që është çmim rekord. Transferimi më i shtrenjtë mbetet ai i Neymarit nga Barcelona te PSG-ja për 222 milionë euro.
Megjithatë, nga ana e lojtarit nuk ka bisedime.
PSG-ja mbetet e bindur se Mbappe tashmë ka rënë dakord me Real Madridin dhe se një kontratë është gati.
Edhe dëshira e 24-vjeçarit besohet se është transferimi te “Los Blancos”.
Kujtojmë se ardhmja e reprezentuesit të Francës vazhdon të jetë e paqartë dhe në qendër të vëmendjes.
Mbappe së fundmi u la jashtë ekipit për turneun para-sezonal të PSG-së në Japoni dhe Korenë e Jugut.
Pozicioni i klubit parisien është i qartë: sulmuesi të zgjasë edhe për një vit kontratën e tij ose të shitet këtë verë.
Ish-sulmuesi i Monacos me kampionët francezë ka kontratë të vlefshme deri në verën e vitit të ardhshëm. /Gazeta Express/
