Paris Saint-Germaini është i bindur se Kylian Mbappe e ka një marrëveshje me Real Madridin për t’iu bashkuar këtij të fundit si lojtar i lirë në vitin 2024, kur edhe do t’i skadojë kontrata.
Një ide dhe mendim të cilin duket se e ka edhe Diego Pablo Simeone, trajner aktual i Atletico Madridit.
“Reali nuk ka probleme ekonomike, mund ta transferojë. Por, unë jam i sigurt se nëse nuk do të ndodhë këtë vit, do të arrijë në Madrid vitin e ardhshëm dhe do të luajmë kundër tij”, u shpreh trajneri argjentinas për mediumin spanjoll “AS”, përcjell “Gazeta Express”.
“Cholo” e pranon se do të donte ta shohë sulmuesin francez duke luajtur në La Liga, edhe pse do t’i sillte probleme dhe vështirësi ekipit të tij.
“Do të më pëlqente shumë ta shoh në La Liga, do të ishte e jashtëzakonshme për të gjithë. Kështu, kampionati ynë do të mbetej në mesin e më të mirëve në botë. Mua më pëlqen dhe më bëhet qejfi nëse lojtarët e mëdhenj vijnë në Spanjë”, vazhdoi ish-futbollisti argjentinas.
“Më i mirë Mbappe apo Haaland? Janë të ndryshëm. Haaland është një ‘bishë’ i golit, një ‘9’-sh perfekt”.
Hovenier sërish kërkon de-eskalim në veri e zbatim të marrëveshjes së Ohrit nga Kosova e Serbia
Read more
