Më 13 mars 2015, Federata e Basketbollit e Kosovës u bë anëtarja e 215-të e FIBA-s. Dyert për pranim të plotë të basketbollit të Kosovës u hapën në momentin që Komiteti Olimpik Ndërkombëtar e njohu Komitetin Olimpik të Kosovës.
Pas takimeve në Stamboll më 2014, Federata e Basketbollit e Kosovës vendosi të punojë drejt aplikacionit për anëtarësim.
Delegacioni i prirë nga kryetari i atëhershëm i FBK-së, Erolld Belegu, dorëzoi aplikacionin për anëtarësim në FIBA më 5 shkurt 2015.
Përgjigja erdhi më 13 mars, pas mbledhjes së Komitetit Ekzekutiv të FIBA, që me votim unanim e pranoi Federatën e Basketbollit të Kosovës si anëtaren e vet të 215-të.
Ndonëse sot janë bërë shtatë vjet nga ky sukses i basketbollit kosovar, nga Federata e Basketbollit e Kosovës sot nuk ka pasur asnjë mesazh për këtë përvjetor historik.
Si në rrjetet sociale, ashtu edhe në uebsajtin zyrtar, shtëpia më e madhe e basketbollit në Kosovës nuk janë “lajmëruar” që nga dita e djeshme.
Ndryshe, pranimi në FIBA i mundëson Kosovës përfaqësim ndërkombëtar pas një çerekshekulli izolim dhe hap mundësi të zhvillimit të basketbollit që Kosova nuk i ka pasur asnjëherë./FrontOnline/
