Drilon Hajrizi është një prej basketbollistëve më të mirë aktual të Kosovës, me një karrierë 15 vjeçare deri më sot, ku ka fituar me ekipet që ka luajtur gjithë trofet e mundshëm në Kosovës. Ai karrierën e ka filluar si 17 vjeç në qytetin e tij me klubin e basketbollit Trepça, duke luajtur për 5 vite radhazi, pra deri më 2013, shkruan Veriu.info.
Mirëpo, kur KB Trepça pati vështirësi financiare, probleme me palestër për shkak të renovimit dhe mungesë të rezultateve, Drilon Hajrizi zgjedhi ta braktis klubin e qytetit të tij dhe të transferohej të KB Peja, që ishte dhe është njëri prej rivalëve historik të KB Trepçës dhe grupit të tifozëve mitrovicas “Torcida”.
Sikur të mos mjaftonte kjo, pas 3 vitesh qendrimi të KB Peja, mitrovicasi Drilon Hajrizi më 2016 ishte transferuar te Sigal Prishtina, që është kundërshtari i përbetuar i mitrovicasve, përkrahës të së cilit klub janë tifozët “Plisat” e të cilët janë rivalët kryesore të tifozëve mitrovicas “Torcida”.
Këta dy kalime në klubet kryesore rivale të KB Trepçës, bën që shumica e tifozëve mitrovicas të grupit “Torcida” ta kritikonin shumë Drilon Hajrizin në ndeshje basketbolli, por edhe jashtë tyre.
Më 2018 Drilon Hajrizi u transferua në një klub japonez, për t’u rikthyer një vit pas në klubin nga Prizreni ‘Bashkimi”, pas të cilit u rikthye prapë të KB Peja, shkruan Veriu.info.
Por në sezonën 2020/21 klubi i basketbollit Trepça u konsolidua financiarisht dhe po bëhej gati të rikthehej fuqishëm në mesin e ekipeve më të mira në Kosovë, gjë që bëri Drilon Hajrizin të rikthehej në klubin e qytetit të tij, i cili me rastin e rikthimit iu kishte kërkuar falje tifozëve.
Rikthimi i tij nuk ishte mirëpritur nga “Torcida”, të cilët kishin dalë me reagim duke kundërshtuar rikthimin e tij, me paralajmërim se nuk do te marrim përgjegjësi për gjërat që mund të ndodhin.
Ardhja e tij në KB Trepça dhe e basketbollistëve tjerë vendorë e ndërkombëtarë, i solli mjaftë suksese klubit nga Mitrovica. Por tifozët mitrovicas “Torcida” asnjëherë nuk e trajtuan Drilon Hajrizin sikurse para vitit 2013, pasi që gjithmonë direkt ose indirekt e atakuan për braktisjen që i kishte bërë KB Trepçës në ditë shumë të vështira për klubin, duke ‘shëtitur’ thuajshe te të gjithë rivalët e KB Trepçës.
Një veprim i tillë, por i përmasave edhe më të mëdha, ndodhi mbrëmë në palestrën e sporteve në Mitrovicë në ndeshjen mes KB Trepça dhe KB Vllaznimi, ku një pjesë e madhe e grupit të tifozëve “Torcida” kanë sharë dhe fyer në kor Drilon Hajrizin.
Këto sharje dhe fyerje ndikuan që pjesa e grupit të “Torcidës” që shanin Drilon Hajrizin të largohen nga palestra e sporteve me intervenimin e policisë.
Se a do të rregullohen raportet mes tifozërisë më të flakt në Kosovë, “Torcidës” dhe Drilon Hajrizit mbetet të shihet në ndeshjet e ardhshme!/Veriu.info
