Pas reagimit të Drilon Hajrizit, i cili tha se individët që tentonin të më dekoncentronin nga loja duke më sharë dhe quajtur tradhëtar e morën përgjigjen e merituar, ka reaguar grupi i tifozëve “Torcida’, ku thonë se provokimi erdhi nga basketbollisti duke kalur organin genital, transmeton VeriuInfo.
“Torcida” thotë se pas sharjeve ndaj tij nga individë të caktuar, erdhi veprimi i papranueshëm nga lojtari në fjalë, që sipas “Torcidës” ai kapi organet gjenitale dhe shau në drejtim të grupimit të tifozëve, me çrast krahas komunikatës është publikuar edhe një video e momentit.
Komunikata e plotë e Torcidës:
Të nderuar anëtarë të “Torcidës”, të nderuar mitrovicas.
Shumë llafe e diskutime, e edhe më shumë thashetheme kishte në qytetin tonë, e sidomos në rrjete sociale, pas ndeshjes së fundit të skuadrës sonë të zemrës, KB Trepça.
Gjërat mbetën pa u sqaruar dhe nga një pjesë, jo e madhe, gishti është drejtuar nga tifo-grupi ynë.
Nuk është sekret që nga fillimi kemi qenë kundër kthimit të basketbollistit me numër 12 në skuadrën tonë, për arsye tashmë të njohura. Për të mirën e Trepçës, kishim një lloj pajtimi që ai të luante për klubin e qytetit. Por jo të gjithë individët, jo të gjithë anëtarët tanë, janë pajtuar me paraqitjen e tij me ngjyrat e skuadrës. Dhe sharjet e individëve të caktuar ndaj tij nuk kanë ndodhur për herë të parë.
Sharje të individëve të caktuar, jo të orkestruara dhe jo në grup, kishte edhe në ndeshjen e fundjavës ndaj Vëllaznimit. Më pas erdhi veprimi i papranueshëm nga lojtari në fjalë. I kthyer me fytyrë nga “Torcida” ai kapi organet gjenitale dhe shau në drejtim të grupimit të tifozëve. Kjo revoltoi anëtarët tanë dhe sharjet u intensifikuan.
Për eskalimin e situatës si tifo-grup nuk jemi përgjegjës dhe nuk pranojmë që të etiketohemi si të tillë.
Ndaj lojtarit që nxiti situatën e pakëndshme kërkojmë që klubi të marr masa disiplinore. Atyre që e shfrytëzuan situatën dhe u munduan të fyejnë tifo-grupin tonë u themi që ne në tribunë ishim edhe kur skuadra e zemrës po kalonte ditët më të vështira e po ashtu kur kalonte ditët më të mira. Ishim aty edhe në udhëtimet më të vështira e më të rrezikshme. Ishim aty për ta mbrojtur e përkrahur klubin, që është i qytetit e i qytetarit e assesi i individëve të caktuar.
Ne do të vazhdojmë të jemi në tribunë, në përkrahje të Trepçës, pavarësisht valëve që sjell jeta. Urojmë që klubi të vazhdojë me suksese se vetëm kështu disa nga ju i shohim në tribuna.
Ne do të jemi në tribunë, sepse:
Trepça është e Mitrovicës
Torcida është e Mitrovicës
Trepça frymon me Mitrovicën dhe Torcidën
Torcida ekziston për Trepçën
Dhe, po, Trepça nuk është Trepçë pa Torcidën
Për fund, mos harroni
Vetëm Trepça është e paprekshme, individët shkojnë e vijnë
TREPÇA është simbol
Torcida është gardiani i saj
Faleminderit
