Një veprim i pazakontë për çdo qeveri ka ndodhur te Qeveria e Kosovës. Faqja zyrtare e Qeverisë së Kosovës në Facebook ka lëshuar LIVE edicionin e lajmeve në Radio Televizioni ne Kosovës (RTK) dhe kjo është vërejtur nga ndjekësit. Një veprim i tillë, përveç se është i pazakontë, ngjall dyshime edhe për shkak të udhëheqjes së RTK-së.
Në krye të transmetuesit publik është Rilind Gërvalla, një ish-funksionar dhe ish-aktivist i zellshëm i partisë në pushtet, Lëvizjes Vetëvendosje.
Vendosja e Gërvallës në krye të transmetuesit publik ishte kritikuar gjerësisht në opinionin publik në Kosovë si tendencë e qeverisë së Kosovës për kapjen e RTK-së.
Gërvallës nuk i kishte pëlqyer qasja e medieve karshi tij kur raportohej se i njëjti kishte qenë pjesë e VV-së dhe madje kishte paralajmëruar padi për mediat.
Lidhur me pavarësinë e televizionit publik është shkruar edhe në Raportin e Progresit të Komisionit Evropian për Kosovën ku thuhet se ndikimi politik është evident.
“Sektori i mediave në Kosovë vuan nga mungesa e transparencës në pronësi dhe financim dhe mungesa e vetë qëndrueshmërisë financiare, duke e bërë atë të pambrojtur ndaj ndikimit politik dhe presion financiar. Transmetuesi publik financohet nga buxheti publik, ndërsa mediat private mbështeten në reklama si mjete kryesore të të ardhurave. Reklamimi i qeverisë në mediat private nuk lejohen më. Mediat e regjistruara si OJQ vazhduan të marrin mbështetje nga donatorët. Mediat joshumicë në Kosovë mbështeten në projekte afatshkurtra dhe në mbështetjen e donatorëve”, thuhet në raport.
Po ashtu në Raport bëhet e ditur se nuk pati asnjë përparim në ndryshimin e Ligjit për Radion dhe Televizionin e Kosovës ose për ndryshimin e Ligjit për Komisionin e Pavarur të Mediave për ta harmonizuar atë me Shërbimet Mediatike Audiovizive të BE-së.
“Ky proces duhet të jetë transparent dhe gjithëpërfshirës, me përfshirjen e aktorëve mediatikë dhe shoqërinë civile. Mungesa e vetë qëndrueshmërisë financiare e lë median të pambrojtur ndaj interesave politike dhe të biznesit.
Emërimi i Gërvallës në krye të RTK-së kishte ngjallur reagime të mëdha për kapje të transmetuesit publik. Atë kohë, Partia Demokratike dhe Lidhja Demokratike e Kosovës kishin reaguar ashpër ndaj këtij vendimi.
Lidhja Demokratike e Kosovës kishte lëshuar komunikatë për media në të cilën thuhej se LDK-ja nuk do të merrte pjesë në asnjë format, emision që organizohet nga RTK-ja.
Për emërimin e drejtorit të ri të RTK-së patën reaguar edhe nga Partia Demokratike e Kosovës (PDK), të cilët thanë se kapja dhe nënshtrimi i RTK-së nën direktivën e pushtetit, është një hap më tutje kundër fjalës së lirë dhe lirisë së mediave në Kosovë.
Ndonëse nuk është e qartë arsyeja pse Qeveria e Kosovës ka transmetuar lajmet e RTK-së, janë evidente kritikat e Raportit të KE-së për situatën në televizionin publik, por po ashtu kritikat opozitare dhe të shoqërisë civile lidhur me “kapjen” e RTK-së dhe mënyrën se si aktualisht menaxhohet./Paparaci
