Trajneri i skuadrës së PSG’së, Mauricio Pochettino sot gjatë konferencës për shtyp ka treguar se sulmuesi francez, Kylian Mbappe ka mundësi që do të jetë kapiten nesër kundër Clermont, transmeton Gazeta Metro.
Çdo ditë e më shumë po flitet për një largim të mundshëm të Kylian Mbappes nga ‘Parc Des Princes’ për tu transferuar në gjigantin spanjoll, Real Madrid.
Derisa nuk ka intervistë e konferencë për shtyp që trajneri i PSG’së, Mauricio Pochettino pyetet lidhur me situatën e 23-vjeçarit, ai edhe sot foli për këtë çështje.
”Ne duam më të mirën për Kylian Mbappe për të dhe për klubin, më e mira për Paris Saint-Germain është që Kylian Mbappe të qëndrojë, është gjithashtu më e mira edhe për të. Po e konsideroj atë si kapiten potencial për nesër” tha Pochettino.
Kylian Mbappe këtë edicion me PSG’në ka realizuar 28 gola në 38 ndeshje në të gjitha garat, duke qenë kështu lojtari me më së shumti gola në klubin francez.
Gjithashtu për dallim nga Lionel Messi dhe Neymar që u fishkëlluan nga tifozët për humbjen ndaj Real Madrid, ai nuk mori asnjë lloj kritike për atë eliminim.
