Ish-portieri legjendar i Manchester United, Peter Schmeichel pas ndeshjes së mbrëmshme mes Real Madrid dhe Manchester Cityt ka deklaruar se nuk e meritonin ‘Los Blancos’ të kualifikoheshin për në finalen e Ligës së Kampionëve sepse ishin skuadër më e dobët në dy ndeshjet e luajtura ndaj ‘Citizens’.
Real Madrid arriti të kualifikohet për në finale të Ligës së Kampionëve pas disa viteve mungesë në fitoren e djeshme ndaj Manchester Cityt me rezultat të përgjithshëm 6-5.
Një duel jashtëzakonisht interesant u zhvillua mbrëmë në ‘Santiago Bernabeu’, ku ‘Madrilenët’ kaluan në finale vetëm pas vazhdimeve dhe këtë sukses të tyre ish-portieri i Manchester United, Peter Schmeichel e ka quajtur të pa merituar.
”Shansin e parë e kishin në golin e parë në minutën e 90’të, goli i dytë ishte rasti i dytë dhe goli i tretë hera e tretë që goditën drejt portës. Nuk ishte e drejtë që Real Madrid të jetë në finale, ata ishin skuadër më e dobët gjatë dy ndeshjeve,” tha ai për CBS Sports.
Më tutje 58-vjeçari kujton se e kishte parashikuar që Bayern Munich do të fitonte kompeticionit më të rëndësishëm për klube në Europë, kurse gjithashtu shton se skuadra e drejtuar nga Carlo Ancelotti kishte bërë vetëm një paraqitje të mirë kundër Chelseat.
”Oh Zot, Real Madrid nga erdhi kjo? Nuk e kam absolutisht asnjë ide, ata nuk luajtën mirë. Parashikimi i Ligës së Kampionëve ka qenë shumë, shumë i vështirë. Unë kisha parashikuar se Bayern Munich do ta fitonte por ata u rrëzuan në çerekfinale. Vetëm loja ndaj Chelseat ishte e mirë nga ata dhe nuk kuptoj më asgjë nga futbolli,” deklaroi ai.
Kujtojmë se finalja e Ligës së Kampionëve këtë sezon do të luhet në Paris, më saktësisht në stadiumin ‘Stade de France’ më 28 maj. Pritet të jetë e mrekullueshme kjo finale pasi që edhe katër vjet më parë Real Madrid dhe Liverpool ishin ballafaquar në finale, ku triumfues në fund kishin dalë ‘Madrilenët’ me rezultat 3-1.
