Shërbimi Korrektues i Kosovës ka bërë të ditur edhe për një person të ikur nga burgjet e Kosovës.
Sipas njoftimit nga ShKK-ja, nesër në ora 11:00 do të mbahet konferencë për media lidhur me dy largimet e fundit nga institucionet e tipit të hapur.
“Ju ftojmë të merrni pjesë në konferencën për media, e cila do të mbahet në Drejtorinë Qendrore të Shërbimit Korrektues të Kosovës, nesër më 13 korrik 2024, në orën 11:00, për të diskutuar lidhur me dy largimet e fundit nga institucionet e tipit të hapur.”
“Në këtë konferencë do të jenë të pranishëm Zëvendësministri i Drejtësisë, z. Blerim Sallahu, dhe Drejtori i Përgjithshëm i SHKK-së, z. Ismail Dibrani, të cilët do të japin informacione të detajuara mbi këtë çështje dhe do të përgjigjen në pyetjet tuaja.” – thuhet në njoftim.
Pak minuta më parë është raportuar në media në lidhje me një të burgosur që është larguar nga Burgu i Dubravës.
Sipas Gazetës Sinjali bëhet e ditur se i larguari është Ujkan Metaj.
Ndërsa, gjithashtu ka kaluar një javë që kur Faton Hajrizi është larguar nga Qendra e Burgimit në Smrekonicë.
Hajrizi është arratisur nëntë herë nga burgjet e Kosovës, së fundmi ai ka folur edhe për ministrin e Punëve të Brendshme, Xhelal Sveçla, ku ky i fundit kishte thënë se është çështje orësh kur ai arrestohet.
“E pyes Sveçlën, ke punu në furrë a si është puna se i kishe do orë të furrigjisë. Nuk mundesh me me kapë ti mu, kurrë s’mundesh me me kap, o ministër i punëve të kota. Ata të cilët me kishin kap edhe me marrëveshje janë në Hagë atje, që ja kisha ngu hatrin, jo lepurushat e Vetëvendosjes, ju njohim mirë kush jeni”, deklaron Hajrizi nga arratia.
Për këtë ka reaguar edhe ministri i Punëve të Brendshme të Kosovës, Xhelal Sveçla.
“Unë nuk e kapi askënd, janë institucionet që merren me ta”, ka deklaruar Sveçla.
“Nuk janë tre persona të arratisur, një është arratisur. Tjerët nuk janë paraqitur para drejtësisë kur është kërku prej tyre. Policia e kryen punën e vet. Nuk ka najfar telashe”, ka vijuar Sveçla.
Në lidhje me arratisjen e Hajrizit sot është deklaruar edhe drejtori i burgut në Smrekonicë, Avni Miftari.
Miftari në një intervistë për Tëvë1, ka hënë se Hajrizi nuk është arratisur, por sipas tij është larguar.
“Vetë natyra e punës apo e tipit apo llojit të institucionit korrektues lë të nënkuptoj sepse siguria në këtë institucion është siguri minimale ku falë tipit apo institucionit korrektues siç është tip i hapur kemi siguri të ulët ku lë të nënkuptoj si nga ana fizike apo materiale. Si nga ana e stafit korrektues sepse kemi një staf më të ulët sepse vet tipi i institucionit korrektues është i atij lloji ku nuk ka pengesa, nuk ka mure dhe për atë arsye nga ky tip mundet siç është rasti i fundit”, thotë ai.
“Sa i përket asaj që ju thatë nuk mund të themi arratisje por largim sepse tash ju vetëm sa patë zonat në të cilat secili i burgosur punon për vend-punime të ndryshme dhe një mundësi të tillë e kanë fare të lehtë dhe ndryshon nga qendrat korrektuese të tjera, sepse qendrat korrektuese të tjera Dubrava mundem me thanë brenda mureve mundet me qenë arratisje apo ikje mirëpo tek këtu është një largim i cili ka ndodhë kështu që nuk kemi diçka çfarë me shtu, ndërsa sa i përket të dënuarve të tjerë të cilët punojnë”, thotë ai.
