Tema e lojtarit më të mirë në botë për më shumë se një dekadë ka qenë pjesë e debateve mes tifozëve, me disa që mendojnë se më i miri ishte Lionel Messi e të tjerë që e favorizonin Cristiano Ronaldon.
Por, edhe gara për trajnerin më të mirë ishte e ashpër.
Tash, faqja “Onefootball” i ka pyetur tifozët se cili është trajneri më i mirë në botë për momentin, përcjell “Gazeta Express”.
Dhe, një pjesë e madhe e votuesve e kanë zgjedhur Carlo Ancelottin, i cili me Real Madridin e fitoi Ligën e Kampionëve dhe La Ligan në edicionin e kaluar.
Pas trajnerit italian renditet spanjolli i Manchester Cityt, Pep Guardiola.
Kurse, vendi i tretë është rezervuar për spanjollin tjetër, Xabi Alonso, i cili bëri sensacion me Bayer Leverkusenin, të cilin e shpalli kampion të Gjermanisë për herë të parë në histori dhe Granit Xhakën me shokë i dërgoi deri në finale të Ligës së Evropës.
Në vendin e katërt gjendet trajneri aktual i Barcelonës, Hansi Flick, i ndjekur nga ai i Arsenalit, Mikel Arteta, i cili e mbyll Top 5-shen.
Më poshtë gjendet dikur trajneri më i mirë në botë, Jose Mourinho. /Gazeta Express/
