Klubi i futbollit Trepça nga Mitrovica i ka dalë në mbrojtje Federatës së Futbollit të Kosovës në krye me Agim Ademin se kinse ky institucion po sul*mohet pabazë në emisione të caktuara sportive në televizionet tona, raporton Gazeta Online VeriuInfo.
Sipas KF Trepçës deklaratat e pabaza në media e pengojnë futbollin kosovar dhe pengojnë përpjekjet për avancim.
FFK ka dërguar letër në Asociacionin e Gazetarëve të Kosovës duke shprehur pakënaqësi për diskutimet që po bëhen në emisionet sportive për këtë institucion.
AGK iu është përgjigjur kësaj letre se e konsideron si të papranueshme dhe presion i hapur ndaj gazetarëve dhe mediave në Kosovë.
Reagimi i KF Trepçës:
Reagim publik!
KF Trepça shpreh shqetësimin dhe indinjatën lidhur me akuzat e pabaza të drejtuara ndaj Federatës së Futbollit të Kosovës (FFK).
Këto akuza përbëjnë një sulm të padrejtë ndaj përpjekjeve të vazhdueshme që po bëhen për përparimin e futbollit kosovar.
Si një klub me histori të gjatë dhe të pasur, nuk mund të heshtim ndaj këtyre deklaratave të rreme, të cilat vijnë nga persona jashtë botës së futbollit dhe që nuk pasqyrojnë realitetin e punës që po bëhet për të zhvilluar sportin në Kosovë.
Të gjitha klubet e futbollit në Kosovë, përfshirë KF Trepçën, po japin maksimumin për të ngritur nivelin dhe standardin e futbollit.
Deklarata të tilla të pabaza vetëm sa dëmtojnë imazhin e futbollit kosovar dhe pengojnë përpjekjet për përmirësim të vazhdueshëm.
Federata e Futbollit e Kosovës (FFK) është institucioni që mbron dhe zhvillon sportin tonë, dhe ne e mbështesim atë në çdo hap për përparimin e futbollit në vend.
Nëse nuk mund të ndihmoni, ju bëjmë thirrje të mos pengoni ata që po punojnë me përkushtim për të ardhmen e këtij sporti.
Me respekt,
KF Trepça.
Më poshtë ju sjellim përgjigjen e AGK-së ndaj letrës së FFKsë:
Kërkesa e FFK-së ndaj AGK-së, formë e presionit ndaj medieve dhe gazetarëve
Asociacioni i Gazetarëve të Kosovës e ka pranuar një kërkesë nga Federata e Futbollit të Kosovës, në të cilën ajo shpreh pakënaqësi për diskutimet që bëhen në emisionet sportive për këtë institucion dhe Kombëtaren e Kosovës.
Në letër, FFK-ja, akuzon, pa asnjë bazë, disa emisione sportive se po bëjnë “fushatë mediale kundër FFK-së”.
AGK-ja, e konsideron këtë letër të hapur të FFK-së, si të papranueshme dhe presion të hapur ndaj gazetarëve dhe medieve në Kosovë.
Liria e shprehjes dhe liria e medies janë të garantuara me Kushtetutën e Kosovës, dhe është detyrë e gazetarëve dhe medieve, që ta mbajnë FFK-në përgjegjëse për vendimet dhe veprimet e saj.
#AGK #gazetaret
—-
www.agk-ks.org
