Vetëm pak ditë pasi kërkoi ndihmën e NATO-s për rivendosjen e zonës së sigurisë tokësore në kufirin Kosovë-Serbi, kryeministri i Kosovës, Albin Kurti, ka akuzuar sërish Serbinë të shtunën në mbrëmje për “provokim” përmes lëvizjes së trupave afër kufirit me Kosova. Në të njëjtin postim, Kurti pretendoi ndër të tjera se Qeveria ka bërë “investime të paprecedenta në ngritjen dhe përmirësimin e kapaciteteve të strukturave të inteligjencës, sigurisë dhe mbrojtjes”, pikërisht në kohën kur komandanti i FSK-së ngriti alarmin për zgjidhjen e çështjes së ushqimit të ushtarëve.
Në një letër dërguar të hënën ministrit të Mbrojtjes, Ejup Maqedonci, komandanti Jashari ka kërkuar që të merren masa të menjëhershme për të adresuar çështjet e furnizimit me ushqime.
Letra e Jasharit thekson problemet me shërbimet e kuzhinës në kazermat e FSK-së, veçanërisht mungesën e kuzhinierëve dhe shqetësimet e ngritura nga ushtarët lidhur me cilësinë e vakteve. Ai theksoi nevojën për ndërhyrje urgjente.
“Sipas raporteve të fundit (me të cilat jeni edhe ju të njoftuar) në njësitë e FSK-së janë paraqitur shqetësime lidhur me shërbimet me ushqim, konkretisht me kuzhinierë (vonesa të ndryshme dhe ka raste kur nuk paraqiten në punë). Përveç mungesës së personelit të kuzhinave, e që ka ndikim në kualitetin e ushqimit dhe probleme të furnizimit me artikuj ushqimor, kemi edhe probleme sanitare, e kjo e fundit paraqet rrezik në helmimin dhe përhapjen e infeksioneve tek personeli i FSK- së”, thuhet ndër të tjera në letrën e Jasharit, të cilën e kishte publikuar Insajderi.
Ndonëse Forca e Sigurisë së Kosovës po përballet me një problem tejet të pazakontë në historinë e shtetndërtimit siç është çështja e sigurisë ushqimore, kryeministri Kurti pretendoi se Kosova mbetet e gatshme për të parandaluar çdo kërcënim falë asaj që ai e quan “investime të paprecedenta në ngritjen dhe përmirësimin e kapaciteteve”.
“Qeveria e Republikës së Kosovës ka bërë investime të paprecedenta në ngritjen dhe përmirësimin e kapaciteteve të strukturave të inteligjencës, sigurisë dhe mbrojtjes, të cilat janë të gatshme për të parandaluar çdo kërcënim ndaj integritetit territorial dhe sovranitetit të shtetit tonë.” – tha ai.
Për t’i shtuar më shumë absurditet situatës, vetëm pak ditë më parë kryeministri Kurti bëri thirrje që NATO të rivendosë zonën e sigurisë tokësore në Kosovë.
“Meqë brenda dy vjetëve Serbia e ka sjellë katër herë ushtrinë e saj te kufiri i Kosovës, duhet rikthyer zona tokësore e sigurisë në gjerësinë 5 kilometra rrotull kufirit të Kosovës me Serbinë”, ishte kërkesa e kreut të Qeverisë e prezantuar ditë më parë në mbledhjen e Këshillit të Përgjithshme të Lëvizjes Vetëvendosje.
Ai argumentoi se një masë e tillë do të ndihmonte në parandalimin e provokimeve të mëtejshme ushtarake dhe sigurimin e sovranitetit të Kosovës, pasi sipas tij, presidenti serb po keqpërdor largimin e kësaj zone.
“Ajo u pat hequr në gushtin e viti 2001 kur kryeministër i Serbisë ishte Zoran Xhinqixh, që e vranë dhe këtë tash po e keqpërdorë regjimi i Aleksander Vuçiqit, i cili po sjell artileri, trupa shtesë dhe sistem kundër ajror kinez përbrenda këtij rripi 5 kilomtërsh”, kishte thënë kreu i ekzekutivit.
Megjithatë, përgjigja e KFOR-it për Dukagjinin se zona e sigurisë ajrore dhe tokësore ishte relaksuar plotësisht në vitin 2015, mund të mos jetë ajo që priste Kurti.
“Zona e sigurisë tokësore dhe ajrore, e krijuar përmes Rezolutës 1244 e Këshillit të Sigurimit të Kombeve të Bashkuara dhe Marrëveshjes Teknike Ushtarake të vitit 1999, u relaksua plotësisht në vitin 2015. KFOR-i ka një prani të dukshme dhe fleksibël dhe monitoron nga afër situatën.
Ne vazhdojmë të përmbushim mandatit tonë nga Kombet e Bashkuara – bazuar në Rezolutën 1244 të Këshillit të Sigurimit të vitit 1999 – duke kontribuuar në një mjedis të sigurt, për të gjithë njerëzit dhe komunitetet që jetojnë në Kosovë, në çdo kohë dhe në mënyrë të paanshme.” – tha KFOR-i ndër të tjera.
Kreu i qeverisë publikoi dje një sërë fotografish që sipas tij dëshmojnë praninë e trupave serbe 50 metra afër vijës kufitare me Kosovën.
“Serbia sot ka provokuar sërish duke lëvizur trupat e saj rreth 50 metra afër vijës kufitare me Kosovën, në territorin e komunës së Kamenicës. Institucionet përkatëse të sigurisë së Republikës së Kosovës kanë detektuar menjëherë këto lëvizje provokuese nga ushtria e Serbisë, të cilat kanë për synim nxitjen e tensioneve.” – tha Kurti ndër të tjera përmes një reagimi në Facebook.
Ai tha se tërheqja e tyre është bërë me shpejtësi pasi kanë kuptuar se janë duke u xhiruar.
“Kur e kanë parë që i kemi vërejtur dhe xhiruar, kanë ikur me shpejtësi e janë larguar për në brendi të territorit të tyre.” – tha ai.
