Festa e Real Madridit mbrëmë nuk ishte e plotë.
“Los Blancos” e përmbysën rezultatin në mënyrë të jashtëzakonshme ndaj Borussia Dortmundit në “Santiago Bernabeu” duke fituar në fund 5:2, në ndeshjen e vlefshme për fazën e ligës në Ligën e Kampionëve.
Por, “Mbretërit” kanë pësuar kokëçarje pas lojës, shkruan “Gazeta Express”.
Në fakt, kampionët e Spanjës dhe të Evropës do t’i kenë dy mungesa të rëndësishme në El Clasicon e fundjavës ndaj Barcelonës.
Sipas mediave spanjolle, Reali do të luajë pa portierin Thibaut Courtois dhe pa sulmuesin e krahut, Rodrygo ndaj gjigantit katalunas.
Të dy u lënduan mbrëmë në duel me Dortmundin dhe pas analizave që ua bëri sot, stafi mjekësor i klubit konstatoi se ata nuk do të mundë të kontribuojnë në ndeshjen e madhe të fundjavës.
Barcelona aktualisht është lidere e La Ligas dhe e ka një start të jashtëzakonshëm të sezonit, ndërsa Reali gjendet prapa, i motivuar pas fitores së mbrëmshme.
Katalunasit do të luajnë sonte në Ligën e Kampionëve kundër Bayern Munichut, në derbin e mesjavës, ndërsa më pas më 26 tetor do të kenë punë me Realin në “El Clasico”.
