Sot në orët e hershme të mëngjesit, me urdhër të Prokurorit të Dhomave të Specializuara është arrestuar ish shefi i Agjencisë Kosovare të Inteligjencës, Bashkim Smakaj.
Aksioni i arrestimit të tij ka ndodhur sot, rreth orës 06:30 të mëngjesit dhe është kryer nga forcat policore te EULEX-it.
Kujtojmë se gjatë vitit të kaluar me urdhër të Gjykatës Speciale ishin kryer bastisje në shtëpinë e ish-shefit të AKI-së, Bashkim Smakaj.
Siç ishte raportuar atë kohë, aksioni lidhej me dyshimet për vepra penale kundër administrimit të drejtësisë, përkatësisht për frikësim të dëshmitarëve, hakmarrje dhe shkelje të fshehtësisë së procedurës.
Po ashtu sipas raportimeve ishin sekuestruar prova të ndryshme, përfshirë dokumente dhe telefona.
Veç Smakajt dhe Isni Kilajt sot u arrestua edhe Fadil Fazliu.
Lajmin e ka bërë të ditur i biri i tij, Fahri Fazliu, nëpërmjet një postimi në ‘Facebook’. Fadil Fazliu është vëllai i heronjve Fahri dhe Bahri Fazliu.
“Të nderuar miq, shokë, dashamirë dhe kolegë! Sot, paradite rreth orës 8:00 të mëngjesit para banesës së tij kanë arrestuar babain tim, Fadil Fazliun, luftëtarin e UÇK-së, vëllain e dy heronjve të kombit, Fahri e Bahri Fazliu. Me urdhërë të Dhomave të Specializuara të Hagës është arrestuar dhe pritet të dërgohet për në Hagë. Ballëhapur, kokëlart dhe gjithmonë krenar me të kaluarën tonë të lavdishme”, ka shkruar ndër të tjera ai.
