Paneli Zgjedhor për Ankesa dhe Parashtresa (PZAP) ka gjobitur Lëvizjen Vetëvendosje me 5 mijë e 500 euro për shkak të disa deklaratave të kandidatit për deputet Haxhi Avdyli.
Në një vendim të PZAP, fillimisht thuhet:
“I. Pranohet e bazuar ankesa e subjektit politik Partia Demokratike e Kosovës (PDK), me seli në Prishtinë, Anr.211/2025 e datës 27.01.2025, ashtu që subjektit politik Lëvizja Vetëvendosje (LVV), me seli në Prishtinë, për shkak të shkeljes së Kodit të Mirësjelljes për Subjektet Politike, Mbështetësit e tyre dhe Kandidatët, i shqiptohet dënimi më gjobë në lartësi prej 5,500.00 (pesëmijë pesëqind) euro.
II. Detyrohet Subjekti politik Lëvizja Vetëvendosje (LVV), me seli në Prishtinë, që gjobën e shqiptuar si në pikën -I-, të dispozitivit të këtij vendimi, ta paguaj në afat prej 15 ditëve, nga dita e plotfuqishmërisë së këtij vendimi”.
Paneli e ka arsyetur këtë vendim me atë se Avdyli ka shpërndarë disa deklarata në rrjetin social Facebook, duke përdorur gjuhë të urrejtjes dhe nxitëse ndaj partive të tjera.
“Me datë 27.01.2025 PZAP-i, ka pranuar një ankesë nga subjekti politik Partia Demokratike e Kosovës (PDK), me të cilën pretendon se kandidati për deputet nga radhët e Lëvizjes Vetëvendosje (LVV) z.Haxhi Abdyli ka publikuar në rrjetin social facebook e cila vazhdon të jetë e pranishme në profilin e tij ku i njëjti, kësaj video i ka bashkangjitur tekstin shoqërues, duke përdorur gjuhë urrejtëse dhe nxitëse kundrejt partive kundërshtare. Më tutje në ankesë është theksuar, konkretisht i njëjti në këtë tekst shoqërues shkruan “Malisheva cep më cep me #qeverinëkurti3, për vazhdimin e punëve të mira për vendin, #skakthimprapa për ata që degraduan çdo gjë, e që nuk i japin shpresë këtij vendi. #AlbinKurti mbetet opsioni i vetëm për Kryeministër për 4 vitet e ardhshme. Faleminderit Malishevë që guximshëm VVendosët për #VVGUXOALTERNATIVA. #haxhiabdyli21″ dhe se i njëjti ka bërë shkelje të Ligjit Nr.08/L-228 për Zgjedhjet e Përgjithshme në Republikën e Kosovës, respektivisht nenit 34, paragrafi 1, nën paragrafi 1.11. Përmes ankesës parashtruesi kërkon nga PZAP që të nxjerrë vendim me të cilin do ta aprovojë si të bazuar ankesën” – thuhet në vendim.
