Një rast tronditës i dhunës në shkollë është bërë publik nga Valbona Krasniqi, nëna e një 11-vjeçari që ndjek mësimet në shkollën fillore “Abdullah Shabani” në Mitrovicë. Ajo ka denoncuar se djali i saj ka qenë viktimë e dhunës së vazhdueshme nga disa bashkëmoshatarë, të cilët e kanë kërcënuar, ofenduar dhe madje e kanë sulmuar fizikisht në mënyrë të përsëritur, shkruan Insajderi.
Sipas saj, pavarësisht ankesave të shumta tek prindërit e fëmijëve dhunues, drejtuesit e shkollës dhe kujdestarja e klasës, askush nuk ka marrë masa konkrete për ta mbrojtur djalin.
Madje, ajo pretendon se si “zgjidhje”, mësuesja ka marrë vendim që ta largojë djalin nga klasa e tij, duke e ndëshkuar atë në vend që të ndëshkonte nxënësit problematik.
“Kujdestarja e klasës e cila është në dijeni për rastin “si masë ndëshkuese ka marr vendim që djali im të largohet nga klasa, pa dijenin time, më ka premtu se do ta largoj fëmijën problematik. Edhe pasi është vendos djali im në paralele tjetër, po i njejti fëmijë problematik me disa fëmijë të tjerë kanë shkuar në paralele ku është djali im dhe kanë ushtru dhunë fizike!“, ka shkruar ajo në Facebook.
Situata rëndohet edhe më tej, pasi fëmija sipas saj ka qenë i detyruar të qëndrojë larg mësimit për shkak të frikës, se mund të përjetojë traumat e njëjta.
“Djali nuk ka shkuar sot në shkollë ( e që nuk është e para herë që mungon shkaku i frikës) nga të vjellurat,temperatura dhe traumat e shkaktuara nga këta bashkëmoshatar të tij”.
Ajo e shqetësuar ka shkruar se për shkak të mungesës së sigurisë në shkollë, është detyruar të ndërpresë praktikën dhe të mbetet pa punë, vetëm që të qëndrojë pranë djalit të saj në ambientet shkollore.
Valbona shprehet e tmerruar nga ideja se fëmija i saj mund të kthehet në shtëpi i rrahur, i plagosur, apo edhe më keq, të mos kthehet fare.
Nëna rrëfen se fëmijët dhunues i kishin kërkuar djalit të saj t’ua mbante cigaret elektronike në çantë dhe pas refuzimit të tij, ata e kishin sulmuar dhe e kishin goditur aq shumë sa ai kishte përfunduar duke vjellë nga dhimbjet.
“Ata sot e shantazhuan se im bir duhet t’ua mbaj cigaret elektrike në çantën e tij dhe me rrefuzimin e djalit tim ata e goditen, iu hudhen mbi 10 fëmijë të tjerë sipër duke e shtypur derisa volli”.
Ajo ka bërë të ditur se rasti është raportuar edhe në polici, por sipas saj, drejtori i shkollës i është drejtuar me fjalët: “A je e vetëdijshme me kë po rrokesh, janë familje problematika.”
“Pas ankesës time dhe takimit me prindër më është drejtuar privatisht drejtori i kësaj shkolle me fjalët: A je e vetëdijshme me kë po rrokesh, janë familje problematika. Nga kjo kam ardhë në përfundim se prindërit e fëmijës dhunues janë të fortë edhe kanë imunitet edhe përballë ligjit”.
Duke u ndjerë e braktisur nga institucionet dhe e pafuqishme financiarisht për ta dërguar djalin në një shkollë tjetër, Krasniqi thotë se nuk do të heshtë më për këtë padrejtësi.
“Ndjes por, nuk heshti më, për fëmijën tim të cilin e rrita me shumë mund, pa strehim dhe me shumë peripeti tjera”, shkroi ajo.
