Lëvizja Vetëvendosje (VV), Lidhja Demokratike e Kosovës (LDK), koalicioni mes Aleancës për Ardhmërinë e Kosovës (AAK) dhe Nismës), kanë kandidatë që kanë probleme me ligjin.
Lëvizja Vetëvendosje rezulton se ka numrin më të madh të kandidatëve që kanë probleme me ligjin, gjithsej 14 kandidatë.
Koalicioni i OJQ-ve, Instituti i Kosovës për Drejtësi (IKD), FOL dhe INPO, të enjten gjatë një konference për media kanë prezantuar “Integriteti i kandidatëve, sundimi i ligjit dhe qeverisja e mirë”.
Hulumtuesja e Lëvizjes FOL, Burbuqe Kastrati, ka thënë se tre subjektet politike, së bashku, kanë në lista e tyre në total 23 persona të cilët kanë probleme me ligjin.
“Me probleme me ligjin nënkuptohet për personat që kanë aktakuza aktive ose që janë dënuar për vepra penale. Gjithsej 330 kandidatë që kanë paraqitur të tre këto subjekte, i bie që 7% e tyre të kenë probleme me ligjin”, sqaroi Kastrati para gazetarëve.
Koalicioni mes AAK-së dhe Nismës ka përfshirë në listat e tyre tetë kandidatë që kanë probleme me ligjin.
Ndërsa LDK-ja ka përfshirë në listën e saj një kandidat që ka probleme me ligjin.
Kastrati theksoi gjithashtu se në listën e subjekteve politike të certifikuar për zgjedhjet e 9 shkurtit janë 8 kandidatë që kanë qenë të dënuar për vepra të ndryshme penale.
“Tetë kandidatët për deputetë që kanë dënime, njëri prej tyre është i dënuar në dy raste, për vepra të ndryshme penale. Tre prej këtyre deputetëve janë të dënuar për vepra penale të natyrës korruptive, konkretisht për mosraportim apo raportim të rremë të pasurisë. Kurse për përdorim të armës apo mjetit të rrezikshëm janë të dënuar katër kandidatë”.
Ndërkaq, një kandidat është i dënuar për veprën penale “Sulm ndaj personi zyrtar” dhe “Kanosje”.
Fushata zgjedhore në Kosovë ka nisur zyrtarisht më 11 janar, kurse zgjedhjet e rregullta parlamentare do të mbahen më 9 shkurt të dielën.
Fushata për këto zgjedhjet do të jetë më e gjatë sesa të deritashmet, meqë procesi parazgjedhor dhe zgjedhor organizohet me disa ndryshime që janë bërë në Ligjin për Zgjedhjet.
Me ligjin e ri, heshtje zgjedhore do të vlejë vetëm orët sa kutitë e votimit do të janë të hapura, ndryshe nga zgjedhjet paraprake ku fushata përfundonte një ditë para zgjedhjeve.
