Politologu Shkodran Ramadani ka dhënë një vështrim interesant rreth asaj se si kryeministri Albin Kurti mund të sillej nëse do të ishte në vend të ish-presidentit Hashim Thaçi në vitin 2008.
Ramadani kujtoi se, ndonëse në atë kohë Lidhja Demokratike e Kosovës ishte “në trend të rënies së lirë me 22%”, ndërsa Partia Demokratike e Kosovës “ishte në trend të rritjes rapide me 34%”, këto dy parti u bashkuan.
Në këtë kontekst, Ramadani tha se Kurti do ta shfrytëzonte momentin e keq të LDK-së për ta dërguar vendin sërish në zgjedhje, duke i shkaktuar humbje kohe vendit në një moment kyç.
Postimi i plotë:
Çfarë do të bënte Albin Kurti në vend të Hashim Thaçit në vitin 2008?
Në vitin 2007 LDK ishte në trend të rënies së lirë me 22%, kurse PDK ishte në trend të rritjes rapide në 34%.
Sidoqoftë, këto parti nuk humbën kohë dhe shumë shpejt bën koalicionin, që pak javë më vonë edhe do ta shpallte pavarësinë e vendit.
Po të kishte qenë Albin Kurti në vend të Thaçit, do të mundohej që me çdo kusht ta shfrytëzonte pozitën e dobët të LDK-së dhe do ta dërgonte vendin edhe njëherë në zgjedhje, duke e akuzuar LDK-në si sabotuese të shpalljes së pavarësisë.
Me këtë rast, Kosova kish humb në kohë, por çfarë rëndësie do të kishte kjo për Vetëvendosjen nëse do t’i merrte 51% të votave?!
Jam i sigurt se Thaçi e ka pasë në dorë këtë kartë. LDK ka qenë shumë e dobët dhe Thaçi do ta zvogëlonte edhe më shumë në rast se interesi i tij partiak e jo interesi shtetëror do të ishte prioritet.
Kështu, në fund Thaçi nuk e luajti këtë kartë sepse, përtej të metave jo të pakta të tij si politikan, ai ka ditë të bashkëpunojë e të arrijë konsensus nga çfarëdo pozicioni politik:
1) Si udhëheqës i Delegacionit të Kosovës në Rambuje
2) Si opozitar në Ekipin e Unitetit në Vjenë.
3) Si Kryeministër në fazën e fundit të procesit të zgjidhjes së statusit të Kosovës
Fatmirësisht, Kosova në atë kohë ka pasë lidership të përgjegjshëm që ka menduar para së gjithash për interesin shtetëror e pastaj për interesin partiak.
