Presidenti i LaLigës, Javier Tebas, ka zbuluar se ka raportuar Manchester Cityn në Komisionin Evropian për dyshime mbi manipulimin e bilanceve financiare.
Duke folur në samitin “Business of Football” të Financial Times të enjten, Tebas tha se kishte dorëzuar ankesën në vitin 2023 dhe çështja ndodhet ende në fazën e hetimit.
Skuadra e Premierligës ka refuzuar të komentojë mbi këtë çështje, megjithëse një burim i tha ESPN se ata i mohojnë këto akuza. ESPN ka kontaktuar gjithashtu Komisionin Evropian për një deklaratë.
“City ka shumë kompani në grupin e tyre që ndodhen jashtë strukturës së City Football Group, kompani shtesë ku ata vendosin shpenzimet e tyre,” tha Tebas.
“Këto kompani të tjera pësojnë humbje, por jo vetë klubi. Ne e kemi raportuar Manchester Cityn në BE. Kemi fakte dhe shifra. Kërkuam që City të hetohet. Është shumë e rëndësishme që të gjitha klubet të jenë subjekt i të njëjtave rregulla transparence dhe qeverisjeje, si në aspektin sportiv ashtu edhe në atë financiar. Rasti i Cityt është një ku besojmë se ata kanë transferuar humbjet në kompani që nuk janë zyrtarisht pjesë e City Football Group. A ju kujtohet rasti në Shtetet e Bashkuara? Rasti Enron. Ajo që bënë ata ishte transferimi i humbjeve në kompani të ndryshme. Ky është një rast i ngjashëm. Ata [City] kanë një kompani skautimi, një kompani marketingu. Aty kanë shpenzime shumë të larta. Ata i faturojnë Cityt shuma më të vogla. City ka kosto më të ulëta sesa do të kishte nëse nuk do të kishte këtë rrjet kompanish përreth,” shtoi ai.
Skuadra e Premierligës ka refuzuar të komentojë mbi çështjen, dhe ESPN ka kontaktuar Komisionin Evropian për një reagim.
City është tashmë i përfshirë në një betejë tjetër ligjore, pasi kundërshton akuzat për shkeljen e mbi 100 rregullave financiare të Premierligës.
