Nata mes të premtes dhe të shtunës ishte magjike për peshëngritjen kuqezi pasi në një arenë të rëndësishme siç është Botërori i Peshëngritjes për moshat deri në 17 vjeç, i cili po mbahet në kryeqytetin e Perusë, Lima, ka shkëlqyer peshëngritësja shqiptare Enkileda Carja.
Kjo është hera e parë që Shqipëria fiton medalje ari për të rinjtë në një garë të tillë, me Carjan që është futur në histori. Peshëngritjsa ka dominuar në pedanë duke festuar titullin kampione bote duke vendosur tre rekorde evropiane.
Carja fitoi medalje ari në peshën deri në 64 kg, por mori edhe medalje të bronztë në stilin e shkëputjes pas dy sportisteve nga Kina.
Në stilin e shkëputjes Carja ngriti 98 kg, duke përmirësuar edhe rekordin evropian me 1 kg. Në shtytje sportistja nga Elbasani ia doli të ngrinte 115 kilogramë dhe me shumën totale 213 kilogramë në dygarësh u shpalle kampione bote.
