Qeveria siriane e udhëhequr nga islamistët ka vendosur që gratë duhet të veshin burkini ose rroba të tjera të notit që e mbulojnë trupin në plazhe publike dhe në pishina, ndërsa rrobat e plazhit në stilin perëndimor lejohen në klube private dhe hotele luksoze.
Vendimi i Ministrisë së Turizmit, i lëshuar këtë javë, e shënon herën e parë që autoritetet e Damaskut kanë lëshuar udhëzime që lidhen me atë se çfarë mund të veshin gratë që nga rrëzimi i ish-presidentit Bashar al-Assad nga pushteti në dhjetor, raporton agjencia e lajmeve “Reuters”.
Gjatë regjimit të hekurt të familjes Assad në Siri, i karakterizuar nga një ideologji nacionaliste e sekulare, shteti nuk kishte vendosur kufizime të tilla, edhe pse njerëzit shpesh visheshin në mënyrë modeste në plazhe publike, duke i pasqyruar normat konservatore.
Kërkesat e reja u caktuan në një vendim më të gjerë të datës 9 qershor dhe në të cilin përfshihen udhëzime për sigurinë publike në plazhe dhe në pishina në prag të verës, si mosqëndrimi për kohë shumë të gjatë në diell dhe mbrojtja nga kandilat e detit.
Në vendim thuhet se ata që shkojnë në plazhe dhe në pishina publike duhet të veshin “rroba të duhura noti që i respektojnë njerëzinë publike dhe ndjenjat e segmenteve të ndryshme të shoqërisë”, duke kërkuar “rroba noti më modeste” dhe duke i saktësuar “burkimit ose rrobat e notit që e mbulojnë trupin më shumë”.
Kufizime ka edhe për gjininë tjetër. Burrat duhet të veshin këmishë, kur nuk janë duke notuar, dhe nuk u lejohet që të dalin me gjoks të zhveshur “në zona publike jashtë zonave të notimit – në holle të hoteleve ose… në restorante”, thuhet më tej në vendim.
Në vendim thuhet, gjithashtu, se “në zona publike jashtë plazheve dhe pishinave të notit”, është e parapëlqyer që të vishen rroba të gjera që i mbulojnë krahët dhe gjunjët dhe të shmangen rrobat e tejdukshme ose shumë të ngushta.
Sidoqoftë, në vendim ofrohet një përjashtim për hotelet që kanë katër yje ose më shumë si dhe për plazhet, pishinat dhe klubet private, duke thënë se “veshmbathja normale perëndimore e larjes” lejohet përgjithësisht, “me respektim të moralit publik dhe brenda kufijve të shijes publike”.
