Në kuadër të hulumtimit të ndërtimeve pa leje në Mitrovicë, Veriu.info ka raportuar se si kompania ndërtimore “Medi Premium” po ndërton “Penthouse” pa leje në qendër të Mitrovicës, duke shkelur lejen e marrë për ndërtimin e një objekt banesor me etazhitet B+P+11.
Përmes kërkesës për qasje në dokumente publike, Veriu.info ka siguruar procesverbalin e inspektimit të inspektorëve të ndërtimit në Komunën e Mitrovicës në vendpunishten e kësaj kompanie ndërtimore, ku evidentohet ndërtimi pa leje që po e bën kompania “Medi Premium” në rrugën ‘Nexhip Dragaj’ në Mitrovicë me pronar Albert Halilaj.
Po ashtu Veriu.info ka siguruar edhe gjobën e shqiptuar nga Drejtoria për Inspeksion për këtë mbindërtim pa leje, ku “Medi Premium” është dënuar me 500 euro nga inspektori Vehbi Ahmeti.
Veriu.info posedon edhe aktvendimin e inspektorit Vehbi Ahmeti, i cili ka urdhëruar kompaninë “Medi Premium” që MENJËHERË t’i ndërpres punimet e mbindërtimit në llamellat A – B për arsye të mosrespektimit të lejes së ndërtimit.
Në aktvendim thuhet që nëse “Medi Premium” nuk vepron sipas urdhërit të inspektorit për ndërtim, inspektori do të jetë i detyruar të bie aktvendim për rrënimin e mbindërtimit në këtë objekt afarist-banesor.
Tutje, thuhet që nëse pala (Medi Premium) nuk pajiset me leje të ndërtimit në afat prej 30 ditëve, duhet ta rrënoj mbindërtimin, ndërkaq nëse e largon shiritin dhe vazhdon punimet do të merren masa ligjore, për të cilin proces Veriu.info do ta monitoroj rastin në ditët vijuese.
Ndryshe, mbindërtimet pa leje në objekte banesore kanë për pasojë mospranimin teknik të objekteve të ndërtuara nga organet përgjegjëse komunale, ku në fund pësojnë blerësit e banesave në gjithë objektin, sepse asnjë pronar banese në atë objekt nuk mund të pajiset me fletë poseduese të pronës së tij, ndërkohë që inspektorët e ndërtimit kanë për obligim rrënimin e objekteve pa leje./Veriu.info
“Medi Premium” po ndërton “Penthouse” pa leje midis Mitrovicës, inspeksioni hesht (Foto/Dokument)
