Paparaci ka siguruar dëshmi për lidhjet e afaristit Naser Maloku, pjesë e kompanisë fituese të tenderit për fabrikën e mbetjeve të kafshëve, me njërin prej anëtarëve të Komisionit Vlerësues të Tenderëve në këtë proces prokurimi.
Një fotografi të cilën e ka siguruar Paparaci zbulon lidhjen e Naser Malokut, bashkë-aksionarit të kompanisë fituese të tenderit për fabrikën e mbetjeve shtazore me njërin zyrtarët e AUV-it që vlerësoi ofertat e kompanive.
Fotografia tregon Naser Malokun, aksionarin e kompanisë “LIP KS & IT” SHPK, në shoqërinë e Shkëlzen Morinës, zyrtar i lartë i Agjencisë së Ushqimit dhe Veterinës.
Morina luajti rol vendimtar në procesin e përzgjedhjes së kompanisë së Malokut për marrjen në shfrytëzim të fabrikës së mbejteve shtazore.
Drejtor i Drejtorisë së Administratës në Agjencinë e Ushqimit dhe Veterinës (AUV), ishte pjesë e komisionit vlerësues të tenderëve në rastin e procesit së dhënies në shfrytëzim të fabrikës, rast të cilin është duke e hetuar penalisht Prokuroria Speciale.
Vlerësimi i Shkëlzen Morinës dhe katër anëtarëve të tjerë të Komisionit Vlerësues të Tenderit i hapi rrugë nënshkrimit të kontratës për dhënien në shfrytëzim të fabrikës, në një proces të dyshimtë për një sërë shkeljesh ligjore.
Morina dhe të tjerët, në një takim të komisionit vlerësues të tenderit në tetor të vitit të kaluar, pasi bënë hapjen e dosjes së ofertuesit “LIP KS & IT” SHPK, e vlerësuan ofertën e kompanisë fituese si të përgjegjshme dhe lëshuan dritën e gjelbër për përmbylljen e negociatave mes përfaqësuesve të Ministrisë së Bujqësisë dhe kompanisë fituese.
Pas marrjes së aprovimit nga komisioni i tenderëve, Zyra e Prokurimit të Ministrisë së Bujqësisë e përzgjodhi për kontratë kompaninë “LIP KS & IT” SHPK, bashkë-aksionare e së cilës është Naser Maloku, biznesmeni i cili rezulton të jetë i afërt me anëtarin e komisionit vlerësues të tenderëve, Shkëlzen Morinën.
Kontrata mes Ministrisë së Bujqësisë dhe “LIP KS & IT” SHPK u nënshkrua më 10 janar të këtij viti.
Sipas kontratës, kompanisë “LIP KS & IT” Sh.P.K. i është dhënë e drejta për operim të fabrikës për 20 vite, duke u llogaritur viti 2024 deri në vitin 2044, me mundësi vazhdimi.
Kompania obligohet të paguajë një qira prej 30 mijë euro brenda vitit, që i bie nga 2 mijë e 500 euro çdo muaj, tregon dokumentacioni i kontratës. Neni 4 i kontratës parasheh edhe subvencionin e kompanisë për çdo kilogram të grumbulluar dhe përpunuar.
Kush është Shkëlzen Morina?
Para se të ushtronte funksionin e drejtorit të Drejtorisë së Administratës në AUV, Shkëlzen Morina kishte ushtruar disa funksione në shërbimin civil.
Që nga koha e udhëheqjes së Ministrisë së Infrastrukturës nga Fatmir Limaj, Morina shërbeu në shërbimin civil të këtij dikasteri qeveritar për rreth dhjetë vjet. Për një kohë gjatë kësaj periudhe, mbajti pozitën e drejtorit të Tatimeve. Ishte përgjegjës për shpronësimet e pronave të paluajtshme.
Në vitin 2020, ai u transferua nga Ministria e Infrastrukturës në Ministrinë e Punëve të Jashtme, për t’u emëruar direkt si ushtrues detyre i Sekretarit të Përgjithshëm të MPJ-së.
Gjatë Qeverisë Kurti II, Morina u transferua në një tjetër pozitë të administratës shtetërore. Kësaj radhe u vendos në AUV.
Naser Maloku, biznesmeni i fuqishëm i Ferizajt
Naser Maloku është një nga biznesmenët më të fuqishëm të qytetit të Ferizajt.
Përpos aksioneve në kompaninë e përzgjedhur për marrjen në shfrytëzim të fabrikës së mbetjeve shtazore, ai është drejtor ekzekutiv i kompanisë “Fitorja” Sh.p.k., një biznesi të themeluar para më shumë se 30 vitesh nga babai i tij, Tahiri.
Kompania e cila fillimisht nisi të tregtonte materiale ndërtimore për t’u zgjeruar më pas në ndërtim të komplekseve banesore e vilave.
Bazuar në të dhënat e kompanisë “Fitorja” Sh.p.k. në uebsajtin e saj zyrtar, ajo ka ndërtuar një kompleks vilash në zonën e parkut kombëtar të “Sharrit” në Brezovicë, e cila iu nënshtrua një hetimi penal që rezultoi me mbi 15 të arrestuar.
Një nga njollat më të mëdha të veprimtarisë biznesore të Naser Malokut është vendosja në rrezik e komplet tregut të sigurimeve në Kosovë.
Për disa vite, Maloku si drejtor i “Fitorja” Sh.p.k. e menaxhoi kompaninë e sigurimeve “Kosova e Re”. Atë e çoi në falimentim. Në këtë kompani sigurimesh nën menaxhimin e familjes Maloku, kishte punuar vëllai i zëvendëskryeministrit Besnik Bislimi.
“Kosova e Re” falimentoi nën menaxhimin e kompanisë “Fitorja” Sh.p.k. për shkak të paaftësisë së kompanisë për t’i përmbushur kërkesat ligjore për kapital të përcaktuara me ligj.
Në vitin 2020, kompania kishte mungesë të kapitalit në shumë prej 6 milionë euro dhe mungesë për solvencë 4.50 milionë euro, duke e rrezikur shembjen e sistemit të sigurimeve të cilin e rregullon Banka Qendrore e Kosovës (BQK).
Për shkak të këtyre problemeve, BQK-ja e mbajti kompaninë “Kosova e Re” nën administrim të përkohshëm për 11 muaj në periudhën 2020-2021.
Pas përfundimit të fazës së administrimit, në shtator të vitit 2021, BQK-ja ia revokoi licencën kompanisë në pronësi të “Fitorja” Sh.p.k., duke e vulosur falimentimin e saj.
