Morina i kundërpërgjigjet Pirajt për skandalin e mishit me salmonellë: Hipokrit, bën fushata për prodhime vendore e mishin e blenë nga Rumania

Veriu.info dje ka publikuar një hulumtim ku dëshmohet se si kompanisë “Meka” Sh.P.K. (Meka Halal Food) që promovon produkte ‘hallall’, i janë zbuluar mbi 20 tonë mish pule me bakterin e rrezikshëm Salmonella të importuar nga Rumania.

SKANDAL: Kompanisë Meka që promovon produkte ‘hallall’ i zbulohen mbi 20 tonë mish pule me bakterin e rrezikshëm Salmonella (VIDEO)

Në këtë hulumtim dëshmohet se si Agjencia e Ushqimit dhe Veterinarisë kishte nxjerrë vendim, me të cilin e urdhëronte kompaninë “Meka” Sh.P.K. që këtë sasi mishi ta kthehnte në vendin e origjinisë, Rumani ose të bëntë asgjësimin e tij në Kosovë.

Të gjendur përballë kësaj situate, kompania “Meka” Sh.P.K. kishte vendosur që mishin ta kthente në Rumani.

Pas këtij hulumtimi ka reaguar pronari i “Meka” Sh.P.K., Burim Piraj, i cili thotë cili ka paralajmëruar padi ndaj Veriu.info, të cilën redaksia e gazetës e mirëpret me shumë kënaqësi.

Por fantazia e Burim Pirajt sot ka kaluar në një tjetër nivel të imagjinatës, ku ai pretendon se në hulumtimin e Veriu.info mund të jenë të implikuara dhe “agjencitë e huaja”.

“Duhet organet e sigurisë ta shohin se ku e ka burimin e nxitjes për të bërë një propagandë të tillë, se kjo nuk është hajgare, kjo është nxitje shumë e rëndë për gjithë prodhuesit vendor”, ka thënë Piraj për T7.

Këtij deklarimi të Burim Piraj i është kundërpërgjigjur kryeredaktori i Veriu.info, Gazmend Morina, që është edhe autor i hulumtimit, duke thënë se ky biznesmen është hipokrit.

“Ky patrioti qe organizonte fushata per konsumim te prodhimeve vendore, vet lenden e pare (mishin) per produktet e kompanise se tij e merr nga Rumania, nje shtet qe eshte kunder ekzistences se shtetit te Kosoves. Hipokrit.”, ka shkruar Morina në Facebook, krahas publikimit të fotografive të Piraj që promovonte prodhimet vendore dhe dokumentit të AUV-it që dëshmon se “Meka” Sh.P.K. furnizohet nga Rumania me mish për prodhimin e produkteve të kompanisë.

Morina ka pasur edhe dje një reagim ndaj pronarit të “MEKA” Sh.P.K., duke thënë nuk ka kurrëfarë tendence ndaj kësaj kompani, me ç’rast ka publikuar foto-dëshmi që, sipas tij, tregojnë se si Burim Piraj ishte biznemeni më i promovuar në Veriu.info që prej themelimit të mediumit më 2013.