Në kuadër të hulumtimit për kompanitë që kanë futur ose tentuar të fusin produkte ushqimore në Kosovë me përbërës të rrezikshëm, Veriu.info ka publikuar dje një artikull për skandalin e zbulimit të AUV të 20 tonë mish te kompania “MEKA” të kontaminuar me bakteren salmonella.
Pas publikimit të artikullit nga Veriu.info ka pasur disa deklarime nga përfaqësues të “MEKA” Sh.P.K., të cilët janë munduar që ta devijojnë lajmin dhe kanë tentuar të zhveshen nga përgjegjësia, duke thënë se këtë mish pule e kanë blerë në Rumani dhe, sipas tyre, nuk kanë përgjegjësi.
Duke e parë tendencën e kompanisë “MEKA” Sh.P.K. për devijim të esencës së hulumtimit, Veriu.info ka vendosur t’i publikojë të gjitha dokumentet që ka siguruar nga AUV përmes qasjes në dokumente publike për këtë lëndë.
Ashtu siç kemi raportuar, Veriu.info ka siguruar vendimin e AUV ku dëshmohet se në depon e kompanisë “Meka Food” janë gjetur 20 mijë e 740 kg mish pule të infektuar me bakterin salmonellë, i cili është shumë i rrezikshëm për shëndetin e konsumatorëve.
Se mishi i importuar nga Rumania ka qenë në depon e kompanisë “MEKA” Sh.P.K., dëshmohet edhe përmes faqes së dytë të vendimit të AUV, ku thuhet: “Malli është inspektuar në deponë e subjektit afarist ‘MEKA’ Sh.P.K. dhe këtë rast është përpiluar procesverbali me numër 029641 më datë 21.06.2024 …”
Në bazë të dokumentacionit të siguruar nga AUV, bëhet e ditur se ky mish nga MEKA është importuar nga Rumania, më saktësisht nga kompania “SC Avicarvil Food & Distribution SRL”, pronari i së cilës në Rumani vite më parë kishte pasur skandal me mish të infektuar dhe madje edhe me evazion fiskal.
Nga të dhënat publike në internet, del se “SC Avicarvil Food & Distribution SRL” është pjesë e Grupit “Carmistin”, që drejtuar nga familja Paraschiv, dhe veçmas nga Iustin Paraschiv.
Veriu.info ka gjetur se mediat rumune kanë raportuar për skandale të shumta me evazion fiska të Iustin Paraschiv, por edhe raportime që tregonin se “Carmistin”, pjesë e të cilit është “SC Avicarvil Food & Distribution SRL”, i ishte gjetur mish i shpendëve me salmonellë.
Përndryshe, në pyetjet që Veriu.info i kishte dërguar kompanisë “MEKA” Sh.P.K. për këtë sasi mishi të importuar që ka rezultuar nga analizat si i kontaminuar me bakteren salmonella, pronari i saj, Burim Piraj fillimisht kishte thënë: “Mishi nuk është gjetur në depo së pari! Mishi është importuar, dhe nga mostrat e marra në kufi për analizë ka dalë të jetë me salmonella. Për shkak të kostos së asgjësimit kemi kërkuar që malli të kthehet në origjinë. Malli nën kontrollin e plotë të AUV është ngarkuar dhe kthyer prapë!”.
Veriu.info i kishte dërguar prapë pyetje Burim Piraj, duke i prezantuar dokumentin e AUV që mishi ishte inspektuar në depon e kompanisë së tij, ku ai në përgjigjen e dytë nuk e mohon, por thotë: “Normal që është inspektuar , e ka kuptimin se agjensia kanë ardhë edhe e kanë inspektua para se të kthehet prapa, është gjetë në gjendje të ndarë ashtu siç është udhëruar të ruhet e të mos përdorët dhe më pas janë përpiluar dokumentet për kthim në origjinë. Nëse keni pa qartësi lirisht më kontaktoni prapë.”
Më poshtë gjeni dosjen prej 31 faqeve të dokumenteve të AUV, që dëshmojnë se është testuar mishi i pulës në depon e “MEKA” Sh.P.K., si dhe është urdhëruar të asgjësohet ose të kthehet në Rumani, procesverbalet e inspektimit, si dhe shumë dokumente të tjera:
