Analizat toksikologjike të 27-vjeçarit Agon Zejnullahu, i cili dyshohet se vdiq si pasojë e ndërhyrjes së pakujdesshme nga zyrtarët policorë në Lipjan, nuk do të kryhen në Kosovë.
Gazeta Insajderi mëson se Laboratori i Toksikologjisë në Institutin e Mjekësisë Ligjore është jashtë funksionit për shkak të dëmtimeve të rënda të shkaktuara nga zjarret që kapluan objektin.
Burime të Insajderit bëjnë të ditur se mostrat për analizë janë dërguar në Maqedoninë e Veriut, ku pritet të përcaktohet nëse Zejnullahu ka qenë apo jo nën ndikimin e alkoolit apo substancave narkotike në momentin kritik.
Pavarësisht përpjekjeve të redaksisë, përfaqësuesit e Institutit të Mjekësisë Ligjore nuk kanë kthyer përgjigje deri në publikimin e këtij artikulli.
Përveç pyetje me shkrim, Insajderi e ka kontaktuar përmes telefonit edhe zëvendësdrejtorin, Ditor Haliti por i njëjti nuk e ka hapur telefonin.
Theksojmë se rasti i vdekjes së 27-vjeçarit Agon Zejnullahu më 7 korrik në Lipjan ka shkaktuar reagime të ashpra në opinionin publik dhe ka vënë në qendër të vëmendjes veprimet e Policisë së Kosovës.
Sipas Policisë, Zejnullahu po shfaqte sjellje të dhunshme, duke sulmuar kalimtarë dhe vetura në rrugën “Haradin Bajrami”, ndërsa kishte pasur edhe përpjekje për të hyrë në automjete të tjera. Policia thoshte se kishte marrë gjashtë thirrje nga qytetarë të ndryshëm për këtë rast dhe kishte ndërhyrë rreth orës 00:12.
Në tentim për ta ndaluar, ndaj tij është përdorur sprej mbrojtës për shkak të, siç thuhet, rezistencës aktive dhe tentimit për sulm ndaj zyrtarëve. Pas ndërhyrjes, Zejnullahu ndërroi jetë me pranga në duar, duke ngritur dyshime të forta për tejkalim të kompetencave policore.
Sipas tyre, në vendin e ngjarjes, përveç disa gjësendeve personale, është gjetur edhe një substancë që dyshohet të jetë pluhur narkotik.
Për këtë rast, pesë zyrtarë policorë janë ndaluar dhe suspenduar nga Inspektorati Policor i Kosovës, ndërsa sot është mbajtur seanca dëgjimore ndaj tyre në Gjykatën Themelore.
Ndaj tyre, tashmë është kërkuar masa e paraburgimit prej 1 muaj.
