Drejtori i Përgjithshëm i Policisë, Gazmend Hoxha, ka mbledhur sot në takim drejtorët e Drejtorive Rajonale Policore dhe komandantët e stacioneve policore. Takimi vjen një javë pas rastit në Lipjan, ku një 27-vjeçar, Agon Zejnullahu, vdiq në rrethana të dyshimta gjatë arrestimit, rast për të cilin ndodhen në paraburgim pesë zyrtarë policorë nën dyshimin për vrasje nga pakujdesia.
Sipas njoftimit të Policisë, në këtë takim janë prezantuar rezultatet e raportit gjashtëmujor, por janë diskutuar edhe çështjet që ndërlidhen me performancën në punë, integritetin, disiplinën dhe rritjen e mëtejmë të profesionalizmit policor.
Drejtori i përgjithshëm i PK-së, nga drejtorët rajonal, komandantët e stacioneve, ka kërkuar që të zbatohen në përpikëri, me profesionalizëm dhe integritet të gjitha procedurat e parapara ligjore, udhëzimet dhe rregulloret policore, si dhe synimet, detyrat dhe objektivat strategjike policore” thuhet në njoftim.
Ai ka kërkuar rritjen e bashkëpunimit dhe qasjes më proaktive me komunitetin; rritjen e bashkëpunimit dhe komunikimit të mirëfilltë me qytetarët; rritjen e performancës, integritetit, mbikëqyrjes më efikase dhe disiplinës në punë nga eprorët; parandalimin, hetimin dhe zbulimin e veprimtarive kriminale dhe luftën kundër korrupsionit; uljen e shkallës së krimit të të gjitha formave; ngritjen e sigurisë në trafik dhe parandalimin e aksidenteve, dhe ofrimin e sigurisë ndaj të gjithë qytetarëve pa dallim dhe ruajtjen e rendit kushtetues.
Ndryshe, Policia e Kosovës është përballur me kritika javët e fundit shkaku i disa rasteve që kanë ndodhur. Më i fundit është rasti në Lipjan, ku një 27-vjeçar vdiq gjatë arrestimit. Për rastin janë arrestuar dhe ndodhen në paraburgim pesë policë nën dyshimin për vrasje nga pakujdesia.
Një rast tjetër ka ndodhur në Klinë, ku zyrtarët policorë shihen në disa pamje duke e rrahur një qytetar në oborrin e shtëpisë, ndonëse i kishte prangat në duar. Tjetri rast ishte në Suharekë, ku ndodhi një vetëvrasje brenda stacionit.
Vetëm gjatë gjysmës së parë të këtij viti, në Inspektoratin Policor u dorëzuan qindra ankesa për shkelje disiplinore. Vitin e kaluar, numri i tyre arriti në 1 mijë e 338.
Shumë prej këtyre rasteve kanë të bëjnë me vepra penale si kanosje, lëndim trupor apo sulm fizik.
Policët e përfshirë zakonisht suspendohen, ndonjëherë arrestohen ose transferohen në pozita tjera brenda institucionit.
Javën e kaluar ka pasur disa shkarkime, saktësisht janë shkarkuar komandantët e stacioneve policore në Pejë, Suharekë dhe Klinë. Ndërkohë, ai i Stacionit në Lipjan ka dhënë dorëheqje morale.
Sipas Policisë, kapiten Faik Jahmurataj është caktuar Komandant i Stacionit Policor në Pejë, ndërsa kapiten Enis Lluka do të udhëheqë Stacionin Policor në Klinë.
Kapiten Afrim Sylaj, i cili më parë ka shërbyer në Stacionin Policor në Suharekë, është transferuar në Qendrën Rajonale Operative të Drejtorisë Rajonale në Prizren.
