Prokuroria Themelore në Mitrovicë ka ngritur aktakuzë ndaj Nazmi Mulakut dhe një personi tjetër P.I. për ushtrim të kundërligjshëm të veprimtarisë mjekësore dhe mashtrim, pasi të njëjtit ishin arrestuar korrikun e vitit të kaluar, raporton Gazeta Online Veriu.info.
Të pandehurit, pa kualifikime profesionale, ofronin trajtime të dyshimta mjekësore në ordinancën “Bio Mulakut” në Vushtrri, duke mashtruar qytetarët me produkte jo të sigurta dhe pretendime të rreme për shërim.
Prokuroria Themelore ka arritur marrëveshje për pranimin e fajësisë me të pandehurit, të cilët kanë pranuar fajin dhe janë pajtuar me një dënim të përgjithshëm me gjobë prej 70,000 euro.
Komunikata:
Aktakuzë ndaj dy (2) personave për veprat penale Ushtrimi i kundërligjshëm i veprimtarisë mjekësore ose farmaceutike dhe Mashtrimi
Mitrovicë, 17 korrik 2025 – Prokuroria Themelore në Mitrovicë – Departamenti i Përgjithshëm, ka ngritur aktakuzë në Gjykatën Themelore në Mitrovicë – Dega Vushtrri, ndaj dy (2) të pandehurve N.M., dhe P.I., për shkak të dyshimit të bazuar se kanë kryer veprat penale “Ushtrimi i kundërligjshëm i veprimtarisë mjekësore ose farmaceutike“ dhe “Mashtrimi“.
Prokuroria njofton opinionin publik se deri ne datë 16 korrik 2024, në ordinancën “B. M.” në Vushtrri, të pandehurit me dashje, në vazhdim dhe në bashkëkryerje pa pasur kualifikim profesional kryejnë trajtime mjekësore dhe angazhohen në aktivitete mjekësore për të cilat me ligj kërkohen kualifikime të posaçme, ashtu që pretendojnë se shërojnë sëmundje të ndryshme dhe zgjedhin problemet e qytetarëve, të cilat edhe i postojnë në rrjetet sociale duke pretenduar se i shërojnë, në atë mënyrë që “pacientëve” – të dëmtuarve ju japin tableta dhe çajra të ndryshëm, ujë i cili nuk i plotëson normat për cilësinë e ujit të destinuar për konsum njerëzor.
Po ashtu, të pandehurit, me dashje, në vazhdim dhe në bashkëkryerje me anë të paraqitjes së rreme të fakteve dhe me qëllim të përfitimit të kundërligjshëm të dobisë pasurore për vete, i vënë në lajthim qytetarët dhe me këtë i nxitin që të kryejë një veprim i cili rezulton me dëm material të pasurisë së tyre, në atë mënyrë që përmes rrjeteve sociale bëjnë thirrje për shërimin e sëmundjeve të ndryshme, dhe duke e shfrytëzuar kështu gjendjen e rëndë shëndetësore, sociale dhe emocionale të të dëmtarëve, në atë mënyrë që për një kontroll i marrin nga 100 € dhe për terapi deri në 30 €.
Prokuroria Themelore në Mitrovicë, me dy (2) të pandehurit N.M., dhe P.I., ka arritur marrëveshje për pranimin e fajësisë, ku të pandehurit pranojnë veprat e kryera penale, dhe pajtohen ti rekomandojnë gjykatës qe të i shqiptojnë dënim me gjobë dhe dënim me burgim, i cili me pëlqimin e tyre të zëvendësohet në dënim me gjobë në vlerën e përgjithshme prej shtatëdhjetë mijë (70,000) euro.
Dosja | Krimi me magji e mjekësi popullore, për çka dyshohet “Bio Mulaku”
