Sipas raportimeve nga Italia, Juventusi nuk është i bindur për transferimin e Jadon Sancho nga Manchester United dhe ka pezulluar bisedimet për momentin.
Futbollisti ka qenë pjesë e planeve të tyre prej disa javësh, që kur u ndërpre huazimi i tij te Chelsea, ku Blutë paguan një tarifë për të shmangur detyrimin për ta blerë përfundimisht.
Kontrata e Sanchos me Manchester United skadon në fund të këtij sezoni, çka ka detyruar klubin anglez të zbusë ndjeshëm kërkesën financiare, duke rënë në rreth 15 milionë euro plus bonuse, që do ta çonin totalin në 17 milionë euro.
Juventusi papritur i pasigurt për Sancho
Një marrëveshje dukej e afërt, por sipas gazetarit të merkatos së Tuttomercatoweb, Marco Conterio, Juventusi ka vendosur të shtyjë finalizimin e transferimit.
Raportet tregojnë se klubi bardhezi nuk është i bindur që Sancho është profili i duhur për krahun, veçanërisht pas blerjes së Francisco Conceição nga FC Porto për 32 milionë euro, që u zyrtarizua sot.
Ndërkohë, Sancho është lënë jashtë skuadrës së Manchester United për turneun përgatitor në SHBA, duke konfirmuar se 25-vjeçari nuk është më në planet e klubit.
