Në kuadër të hulumtimit për kompanitë që kanë futur ose tentuar të fusin produkte ushqimore në tregun e Kosovës me përbërës të rrezikshëm, Veriu.info ka gjetur se qumështores ‘Bylmeti’ që është pjesë e kompanisë ‘Bylmeti – KS’ Sh.P.K. i janë asgjësuar mbi 100 prudukte ‘Schmand’ për shkak se kanë qenë johigjienik në kriterin ‘Escherichia coli’
Veriu.info ka siguruar procesverbale e raporte testimi të AUVK për inspektimin e bërë në qumështoren ‘Bylmeti’, ku ka gjetur 123 copë Schmand 400 gr. që kanë rezultuar të pakënaqshëm në apektin e higjienës.
Më këtë rast inspektorët e AUV kanë urdhëruar asgjësimin e kësaj sasie të produktit Schmand 400 gr., ku Veriu.info ka siguruar fotografitë e procesit të asgjësimit.
Në procesverbalin e inspektorëve veterinar të AUV të datës 08.02.2024 thuhet: “Pas njoftimit nga ana e kompanisë ‘Bylmeti’ përmes postës elektronike, kemi dalë në qumështoren e lartcekur ku kemi bërë asgjësimin e produktit Schmand 400 gr në sasi prej 123 copë x 400 gr. Asgjësimi i produktit është bërë në kontejnerët e kompanisë ‘Bylmeti’, dhe arsyeja e asgjësimit ishte se ky produkt ka rezultuar i pakënaqshëm në kriterin e higjienës – Escherichia Coli.”
Veriu.info ka kontaktuar më kompaninë ‘Bylmeti – KS’ Sh.P.K. nga e cila ka kërkuar përgjigje për këtë problem të gjetjes së produkteve që nuk janë higjienike për përdorim.
“Bylmeti ka vepruar me përgjegjësi të plotë, në bashkëpunim të ngushtë me Agjencinë e Ushqimit dhe Veterinarisë (AUV), duke respektuar të gjitha protokollet dhe udhëzimet zyrtare. Sasia e produktit “Schmand 400g” që nuk i ka përmbushur kriteret mikrobiologjike nuk ka dalë në treg për konsum, por është asgjësuar menjëherë në prani të inspektorëve të AUV, sipas procedurave standarde”, ka thënë për Veriu.info pronari i ‘Bylmeti – KS’ Sh.P.K., Afrim Berisha.
Gjatë përgjigjes se pse ka ardhur deri të kjo situatë dhe se a janë ndërmarrë masa për të parandaluar përsëritjen e rasteve të tilla, Berisha deklaruar: “Pas analizimit të rastit, është konstatuar se problemi ka qenë teknik, si pasojë e një defekti të përkohshëm në makinerinë paketuese, që ka rezultuar në mbyllje jo të plotë të disa pakove. Ky është një rast i rrallë që mund të ndodhë në çdo linjë prodhimi ushqimor. Dhe mund ta vëreni se sasia me defekt ka qenë shumë e vogël, gjë që flet për kontroll të mirë të procesit. Po, menjëherë pas identifikimit të shkakut, pajisja është servisuar dhe problemi është eliminuar plotësisht. Gjithashtu janë intensifikuar kontrollet teknike në linjën e paketimit për të shmangur përsëritje të tilla në të ardhmen. Kjo konfirmohet edhe me rezultatet e laboratorit LUV, të cilat tregojnë se produkti është brenda kritereve të lejuara për tregtim dhe konsum.”
Ndryshe, kompania ‘Bylmeti – KS’ Sh.P.K. pjesë e së cilës është qumështorja ‘Bylmeti’ është në pronësi të Imer Berisha dhe Afrim Berisha./Veriu.info
Më poshtë gjeni dokumentet e AUV të siguruara nga Veriu.info për këtë asgjësim produkti në qumështoren ‘Bylmeti’:
