Pronari i FCSB-së, Gigi Becali, pas ndeshjes ndaj Shkëndijës në Shkup, ishte i ftuar në programin e drejtpërdrejtë “Digi Sport Special”, ku publikisht bëri të ditur se dy futbollistë, Ovidiu Perianu dhe Marius Stefanescu, janë përjashtuar nga ekipi.
Të dy u futën në pjesën e dytë, por loja e tyre, siç duket, nuk e kënaqi aspak kreun e klubit. Në deklaratën e tij, Becali ishte kategorik se FCSB do të sigurojë kualifikimin në raundin e tretë kualifikues të Ligës së Kampionëve dhe se ky rezultat ndaj Shkëndijës ia hapi sytë.
“Do të kualifikohemi më tej. Është mirë që kjo ndodhi tani, mi hapi sytë, që të di çfarë duhet të bëj. Nuk më intereson kjo ndeshje, ne do të kualifikohemi në ndeshjen e kthimit”, deklaroi Becali.
Ai shtoi se skuadra e kishte kontrolluar tërësisht ndeshjen, por që pasiviteti dhe nënvlerësimi i kundërshtarit çuan në një rezultat të papëlqyeshëm. Sipas tij, disa lojtarë nuk u futën në fushë me qasjen e duhur.
“E gjithë ndeshja ishte nën kontrollin tonë, por kur nuk ka seriozitet, Zoti të tregon se nëse nuk punon, nuk fiton. Gjithçka ishte pasojë e një qasjeje jo të mirë. Sidomos kur panë sa të dobët ishin kundërshtarët”, shtoi Becali.
Ndeshja e kthimit mes FCSB-së dhe Shkëndijës do të luhet të mërkurën e ardhshme në “Arenën Kombëtare” në Bukuresht, me fillim në ora 20:30.
