International Betting Integrity Association (IBIA) është organizata e krijuar nga kompanitë më të mëdha të basteve sportive që operojnë në të gjithë globin. Kjo organizatë në çdo tre muaj publikon raportin e saj që zbulon tentativa për trukim të ndeshjeve dhe në raportin e publikuar në tremujorin e dytë të këtij viti me një rast është e përfshirë edhe Kosova.
Pjesëtarë në IBIA janë kompani të famshme të basteve si ‘William Hill’, Ladbrokes’, ‘Bet365 ‘ etj. Të gjitha këto kompani shumë të njohura, bashkëpunojnë së bashku për të identifikuar ndeshjet ku lëvizjet e koeficienteve tregojnë se ka tentativa të qarta të manipulimit të rezultateve.
Në raportin e tremujorit të dytë të 2022, prill-qershor, IBIA ka sinjalizuar për 88 raste të dyshimta, ku 32 i përkasin futbollit dhe 12 janë për zonën e Europës, ku në një prej tyre figuron edhe Kosova.
Përveç Kosovës të përfshira në zonën e Europës janë Çekia, Rumania dhe Suedia me nga dy raste, ndërsa me nga një rast janë Shqipëria, Finlanda, Italia, Mali i Zi dhe Holanda.
IBIA është organizatë e cila duhet të merret shumë parasysh në momentin kur publikon raportet e saj, pasi që para disa vitesh pothuajse në çdo tremujor kishte sinjalizime për trukime në Shqipëri.
Ndërsa, në momentin kur ishte bërë ‘e madhe’ çështja e Skënderbeut të Korçës, e cila u dënua për 10 vite nga UEFA, atëherë sinjalizimet ishin minimizuar.
Vlen të theksohet se IBIA ka marrëveshje bashkëpunimi me dy organet më të larta të futbollit, FIFA’n dhe UEFA’n, të cilave i raporton rregullisht për ndeshjet të cilat dyshohet se janë trukuara.
Pra, kjo nënkupton se ndeshja e cila është cilësuar si e dyshimtë në Kosovë është raportuar në instancat më të larta drejtuese të futbollit botëror.
KËTU mund të shikoni faqen e tyre zyrtare.
