Ekspedita e Kombëtares së Kosovës është nisur sot drejt Bazelit, ku të premten do të përballet me Zvicrën në takimin e parë kualifikues për Kampionatin Botëror 2026.
Pas disa ditësh stërvitje intensive, skuadra dardan ka udhëtuar me motiv të lartë, ndërsa videot dhe fotografitë e publikuara nga faqja zyrtare e FFK-së tregojnë një atmosferë të mirë brenda ekipit dhe shpresë për një rezultat pozitiv.
Ndeshja është planifikuar të fillojë në orën 20:25 në stadiumin St. Jakob-Park.
Gazeta zvicerane “Blick” ka raportuar se të gjitha biletat për ndeshjen Zvicër-Kosovë, tashmë janë shitur.
Ky veprim, sipas kësaj gazete, nuk është aspak i befasishëm duke pasur parasysh diasporën e madhe shqiptare në Zvicër.
“Siç pritej, biletat e St. Jakob Park janë shitur plotësisht paraprakisht për duelin kundër Kosovës. Ashtu si në ndeshjen kualifikuese të Kampionatit Evropian në nëntor 2023, është mjaft e mundur që një pjesë e madhe e tifozëve në Joggeli do të mbështesin ekipin mysafir”, shkruan “Blick”.
Ndërkaq, ky medium thotë se për ndeshjen e dytë kualifikuese të Zvicrës në kuadër të Kupës së Botës kundër Sllovenisë të hënën nuk pritet atmosferë e ngjashme.
“Vetëm rreth 8000 nga 33,996 biletat e mundshme janë shitur deri më tani”, shkruan “Blick”.
