Ballkani Perëndimor, përfshirë Kosovën, vazhdon të mbetet ndër prioritetet kryesore të politikës së jashtme gjermane.
Kështu u theksua në hapjen e Konferencës së 23-të të Ambasadorëve që po zhvillohet këtë javë në Berlin.
Konferenca u hap me fjalimet e kancelarit gjerman, Friedrich Merz, dhe ministrit të Jashtëm, Johann Wadephul, të cilët nënvizuan rëndësinë e partneritetit të Gjermanisë me vendet e rajonit dhe bashkëpunimin e ngushtë për paqe, stabilitet dhe zhvillim të përbashkët.
Gjatë ditëve në vijim, ambasadori gjerman në Kosovë, Jörn Rohde, së bashku me kolegët e tij nga mbarë bota, do të diskutojnë për drejtimet strategjike të politikës së jashtme të Gjermanisë dhe mënyrat për forcimin e bashkëpunimit ndërkombëtar, bëhet e ditur në njoftimin e Ambasadës gjermane.
Konferenca e Ambasadorëve në Berlin mbetet një nga forumet më të rëndësishme për hartimin e politikës së jashtme gjermane dhe përcaktimin e prioriteteve të saj në raport me partnerët global./Reporteri.net/
