Kryetari i Aleancës për Ardhmërinë e Kosovës, Ramush Haradinaj, ka kërkuar rritjen e buxhetit për mbrojtje, veprim urgjent për strehimoret dhe nisjen e prodhimit të municioneve e predhave.
Ai ka thënë se sipas të dhënave nga buxheti i vitit 2025, GDP është vlerësuar në 11 miliardë e 83 milionë euro. Për vitin 2026 pritet të arrijë në rreth 12 miliardë, për vitin 2027 rreth 13 miliardë, ndërsa për vitin 2028 dhe 2029 nuk ka vlerësime të sakta, por sipas dinamikës pritet të arrijë përkatësisht në 14 miliardë dhe 15 miliardë e 200 milionë euro.
Sipas tij, për vitin 2025 për mbrojtje janë ndarë 1.87% e GDP-së, ndërsa për vitin 2026 vetëm 1.77%
“Për vitin 2025, për mbrojtje janë ndarë 207,8 milionë euro ose 1.87% e GDP-së. Për vitin 2026 janë paraparë 212,7 milionë ose 1.77% e GDP-së, për vitin 2027 janë paraparë 218,8 milionë euro ose 1.68% e GDP-së, për vitin 2028 sipas kësaj dinamike 238 milionë ose 1.7% dhe në vitin 2029, 250 milionë ose 1.7% e GDP-së. Gjithsej, në mandatin qeverisës 2026-2029, Qeveria Kurti në largim parasheh 920 milionë euro buxhet për mbrojtje”, ka theksuar Haradinaj.
Ai ka shtuar se nëse zbatohet rregulli i ndarjes 4% të GDP-së për mbrojtje, shuma duhet të jetë dukshëm më e lartë.
“Nëse i përmbahemi rregullit të ndarjes për mbrojtje 4% të GDP-së vjetore, atëherë për mbrojtje duhet ndarë këtë shumë nga buxheti: në vitin 2026 rreth 480 milionë euro, në vitin 2027 rreth 520 milionë euro, në vitin 2028 rreth 560 milionë euro dhe në vitin 2029 rreth 600 milionë euro. Gjithsej, në mandatin qeverisës 2026-2029 duhet ndarë 2 miliardë e 160 milionë euro”, ka deklaruar ai.
Përveç çështjes së buxhetit, Haradinaj ka theksuar se duhet ndërmarrë veprime urgjente për krijimin e strehimoreve dhe nisjen e prodhimit vendor të municioneve.
“Po ashtu, të veprohet me urgjencë në nivel të Ministrisë së Mbrojtjes, Ministrisë së Punëve të Brendshme, Agjencisë së Menaxhimit Emergjent dhe Zjarrfikësve, për identifikimin e të gjitha podrumeve por edhe hapësirave tjera private për shndërrim të tyre në strehimore, që do të shërbenin në situata kritike të sigurisë. Është e pafalshme vonesa në nisjen e prodhimit të municioneve dhe predhave”, ka thënë Haradinaj.
