Firma që falimentojnë, largime jashtë vendit, deficite të mëdha në sektorin e sigurimeve sociale, një popullsi e pakënaqur: Vetëm 22 përqind e të anketuarve në sondazhin e fundit të ARD-së për Gjermaninë në fillim të shtatorit u shprehën të kënaqur me punën e qeverisë së përbërë nga Unioni kristiandemokrat/kristiansocial (CDU/CSU) dhe Socialdemokratët (SPD).
Kancelari Friedrich Merz (CDU) kuptohet që është nën presion nga rezultate të tilla në sondazhe – dhe për këtë arsye ai ftoi kabinetin qeveritar për konsultime në rezidencën Vila Borsig në Berlin. Konsultimet përfunduan të mërkurën (01.10.2025). “Modernizimi i shtetit që do të ishte dashur të realizohej me kohë tani duhet të avancojë shpejt”, tha Merz gjatë konsultimeve të qeverisë. “Ne duhet të verifikojmë rendimentet shtetërore dhe duhet të bëhemi më efikas dhe më pak të ndërlikuar”.
Kërkohen ritme të shpejta, beson Merz: “Sipërmarrjet ndodhen pjesërisht me shpatulla pas murit ose me një këmbë në humnerë.” Ekonomia gjermane duhet të rritet sërish, Gjermania si zonë ekonomike duhet “të bëhet sërish joshëse për investime”.
Qëllimi: Themelimi i sipërmarrjes në një ditë
Pikërëndesa e “Agjendës së modernizimit” konsiston në reduktimin e burokracisë, zhdërvjelltësimin e administratës, forcimin e digjitalizimit si dhe përdorimin e inteligjencës artificiale në administratë. Aparaturat e fakseve ende gjenden nëpër zyrat gjermane duke qendruar atje si një simbol për ngecjen e reformave. Vendi prej shumë vjetësh është bërë si një “nyje”, sikurse e formuloi ministri për Modernizimin e Shtetit dhe Digjitalizimin, Karsten Wildberger.
16 miliard euro duhet të kursehen deri në fundin e periudhës legjislative në vitin 2029 nga ulja e burokracisë dhe personeli i federatës duhet të reduktohet me rreth tetë përqind.
Bëhet fjalë për rreth 80 masa të veçanta. Shembuj: Në të ardhmen automjeti mund të regjistrohet në mbarë Gjermaninë përmes një portali të unifikuar, deri tani ekzistojnë 400 portale të veçanta të landeve dhe komunave. Themelimi i sipërmarrjes duhet të jetë i mundur brenda një dite – po ashtu përmes një portali qendror.
Për rekrutimin e punonjësve të huaj të kualifikuar do të krijohet një agjenci digjitale “Work-and-stay-Agentur”, përmes së cilës do të zgjidhen në mënyrë të centralizuar çështjet e vizës ose të njohjes së diplomave profesionale.
Në adresë të Bashkimit Europian, Merz pas konsultimeve qeveritare tha: “Janë vërtetë shumë”, shumë rregullore, që vijnë nga Brukseli.
Konsulta qeveritare e zhvilluar tani në Berlin është një ndër masat më të fundit të qeverisë për t’i dhënë shtysë reformave aq të nevojshme në vend duke harmonizuar qendrimet për shumë tema të diskutueshme brenda koalicionit. Kancelari Merz theksoi, se e kemi arritur qëllimin duke krijuar “një atmosferë pune shumë, shumë të mirë, shumë kolegiale dhe të hapur në këtë koalicion”. Javët e ardhshme do të tregojnë, nëse ai ka të drejtë.
Reforma për sigurimet sociale më vonë
Sfidat vërtetë të mëdha për koalicionin janë ende përpara, si p.sh. reformimi i sigurimeve sociale. Shoqërive të sigurimeve për shëndetësinë, kujdesin dhe pensionet po u mbarojnë paratë. Rritja e kuotizacioneve për të siguruarit do të rëndonte edhe më shumë sipërmarrësit dhe do të dobësonte edhe më shumë aftësinë konkurruese të Gjermanisë.
Shteti vërtetë ka marrë borxhe të reja, por këto para nuk do të derdhen në konsum, por do të përdoren për forcimin e Bundeswehrit si dhe modernizimin e infrastrukturës. Ndaj si rrugëdalje koalicioni sheh kursime në sektorin e ndihmës sociale. Për reformimin në këtë sektor fillimisht komisionet përkatëse do të përpilojnë propozimet, përpara se të vendosë kabineti qeveritar.
Merz deklaroi fillimisht një “vjeshtë të reformave”. Por pasi u bë e qartë, që brenda një stine nuk mund të realizohen reformat, ai tha në Bundestag, se: “Do të vijë dimri, pranvera, vera dhe do të pasojë vjeshta tjetër me reforma.”
Qeveria shpreson, që fryma jo e mirë në Gjermani mund të ndryshojë pozitivisht. Zëvendëskancelari Lars Klingbeil (SPD), sipas pjesëmarrësve në konsultimet e qeverisë, tha së është e nevojshme një kthesë kulturore në vend, për të krijuar një frymë optimiste për hov zhvillimi.
Me rastin e 3 Tetorit ditës së bashkimit të Gjermanisë, kancelari do të mbajë një fjalim, ndoshta në fjalën e tij ai të vendosë theksin për një hov të ri në vend./DW
