Presidenti i FIFA-s, Gianni Infantinoi ia ka dedikuar Medaljen e Nderit legjendës së futbollit kosovar, Fadil Vokrri.
Të mërkurën në një ceremoni shtetërore, Infantino është dekoruar nga presidentja Osmani me Medaljen e Nderit.
Pas ndarjes së këtij çmimi, Infantino tha se ndihet shumë i privilegjuar me këtë çmim dhe me prezencën e tij në Kosovë, të cilën e cilësoi si shtëpia e tij.
Medaljen e Nderit, Infantino tha se ia dedikon ish-presidentit të FFK-së, Fadil Vokrrit.
“Një kënaqësi e vërtetë të jem në shtëpi sot, në Kosovë. Kosova sot dhe Prishtina është kryeqyteti i botës. Siç e dimë futbolli është më i rëndësishmi në botë atëherë është kryeqyteti i botës. Do të doja t’ia kushtoja këtë medalje Fadil Vokrrit. Për Vokrrin dhe për të gjithë njerëzit në Kosovë dhe jashtë saj”, ka thënë fillimisht Infantino.
I pari i shtëpisë botërore të futbollit rrëfeu momente të veçanta nga takimet me Vokrrin deri te pranimi i Kosovë në FIFA dhe UEFA.
Ai bëri të ditur se Vokrri kishte bërë çmos që Kosova të pranohej sa më parë në organizatat botërore të futbollit.
“E kam takuar disa herë Fadilin dhe e mbaj mend se kur Kosova ishte një shtet shumë i ri dhe FFK dëshironte të bëhej anëtare e saj ishte pak e sikletshme të takohej me dikë nga Kosova për shkak se shumë shtete nuk e njihnin si shtet të pavarur. Kur u takova për herë të parë me të dhe biseduam gjatë isha pjesë e departamentit ligjor të UEFA-s dhe pas shumë takimeve po i thoja se do të shohim çfarë do të ndodhë, pasi që tashmë vetëm se kishim biseduar shumë herë. Pas shumë këmbënguljeve në fund e kuptova kurajon e njerëzve që besonin në shtetin e tyre dhe në atë çfarë ata dëshironin. Kjo këmbëngulje i solli njohjen nga UEFA dhe FIFA. Pasi i thash Fadilit se nuk do të takoheshim më, ai më dilte gjithkund. Fadili ishte në çdo samit, në çdo seminar, çdo herë kur e hapja derën ose dritaren Fadili më dilte aty, i pari”, rrëfeu me buzëqeshje Infantino.
Ai e cilësoi si nder pranimin e Kosovës në FIFA nën udhëheqjen e tij.
“Kur u bëra president i FIFA-s e kisha shumë të qartë që në kongresin e parë Kosova të bëhej pjesë e FIFA-s dhe kështu ndodhi. Kisha nderin që derisa isha president i FIFA-s dhe në 3 mujorin tim të parë, Kosova të pranohej në FIFA”, deklaroi Infantino.
Presidenti i FIFA-s bëri të ditur se lidhjen e njohjen e tij me Kosovën e kishte edhe para se Kosova të ishte shtet i pavaruar.
Ai tregoi disa momente që kishte kaluar me emigrantët shqiptarë në Zvicër gjatë periudhës së luftës në Kosovë.
