Kina ua zuri vendin Shteteve të Bashkuara si partnerja më e madhe tregtare e Gjermanisë në tetë muajt e parë të vitit 2025, duke e rimarrë pozitën e parë pasi taksat më të larta nga Uashingtoni ndikuan negativisht ndaj eksporteve gjermane matanë Atlantikut, sipas të dhënave preliminare të zyrës gjermane të statistikave.
Vlera e përgjithshme e importeve dhe eksporteve gjermane me Kinën e arriti shumën prej 163,4 miliardë eurosh nga janari deri në gusht, ndërsa tregtia me Shtetet e Bashkuara ishte 162,8 miliardë euro, sipas përllogaritjeve të agjencisë “Reuters”.
ShBA-ja ishte partnerja më e madhe tregtare e Gjermanisë më 2024, duke i dhënë fund një periudhe 8-vjeçare të mbizotërimit të Kinës në atë pozitë. Ndryshimi ndodhi në periudhën kur Berlini synonte që ta zvogëlonte varësinë nga Kina, duke i përmendur si arsye dallimet politike dhe duke e akuzuar Pekinin për praktika të padrejta.
Megjithatë, dinamikat tregtare ndryshuan përsëri këtë vit, me rikthimin e amerikanit Donald Trump në Shtëpinë e Bardhë e, bashkë me të, edhe taksat e reja.
Taksat kanë shkaktuar ulje të eksporteve gjermane në Shtetet e Bashkuara. Ato u pakësuan për 7,4 për qind në tetë muajt e parë të vitit në krahasim vitin 2024 – në 99,6 miliardë euro. Në gusht, eksportet në ShBA shënuan rënie për 23,5 për qind në krahasim me muajin e njëjtë të vitit paraprak, duke treguar se ky trend është duke u përshpejtuar.
“Nuk ka dyshim se politika e ShBA-së me taksat është një arsye e rëndësishme për rënien në shitje” – tha Dirk Jandura, kryetar i shoqatës për tregti të jashtme BGA.
Jandura tha se kërkesat e ShBA-së për mallrat klasike gjermane, si veturat, makineritë dhe produktet kimike, kanë shënuar rënie.
