Drejtori i kompanisë Feis Com Beton, Mehmet Hasani, ka ngritur shqetësimin për mungesën e lëndës së parë në tregun vendor për prodhimin e betonit, raporton Gazeta Online Veriu.info.
Kjo situatë ka ardhur si pasojë e bllokadës institucionale për procesin e vazhdimit të licencave për kompanitë minerare.
Hasani ka paralajmëruar se nëse kjo situatë nuk zgjidhet shpejt do të jenë të detyruar ta kufizojnë prodhimin e betonit të gatshëm.
“Ne shpresojmë që institucionet përgjegjëse të ndërmarrin masat e nevojshme sa më shpejt për zgjidhjen e kësaj çështjeje.” – thuhet në njoftim.
Komunikata e plotë:
📢 NJOFTIM PËR MUNGESËN E LËNDËS SË PARË (RËRËS DHE ZHAVORIT)
Të nderuar klientë dhe bashkëpunëtorë,
Për shkak të mungesës së theksuar të zhavorit dhe gurit natyror në tregun vendor — si pasojë e bllokadës institucionale në procesin e vazhdimit të licencave për kompanitë minerare — kompania jonë po përballet me vështirësi serioze në sigurimin e lëndës së parë për prodhimin e betonit të gatshëm.
Nëse kjo situatë nuk zgjidhet në një periudhë të afërt, do të jemi të detyruar të kufizojmë prodhimin e betonit të gatshëm, në varësi të mundësive për furnizim me rërë dhe zhavor.
Ne shpresojmë që institucionet përgjegjëse të ndërmarrin masat e nevojshme sa më shpejt për zgjidhjen e kësaj çështjeje.
Faleminderit për mirëkuptimin dhe bashkëpunimin tuaj të vazhdueshëm.
Me respekt,
Feis-Com BETON
