Trajneri i Milanit, Massimiliano Allegri, këmbëngul se nuk ka qenë ai që e ka bindur Mike Maignan të qëndrojë në “San Siro”, pavarësisht ofertës nga Chelsea: “Meritat i takojnë Claudio Filippit dhe klubit”.
Maignan ishte një nga heronjtë e Milanit mbrëmë, pasi “Rossonerët” siguruan një fitore 1-0 ndaj Romës në “San Siro”.
Portieri francez priti një penallti të Paulo Dybala në minutat e fundit, duke i lejuar gjigantët e Serie A të kapin Romën dhe Interin në vendin e dytë me 21 pikë.
Maignan kishte tërhequr interesin e Chelseat gjatë merkatos së verës, por “Blutë” nuk arritën të përmbushnin kërkesat financiare të Milanit.
Raportohej se edhe Allegri kishte ndihmuar që Maignan të mos largohej nga klubi, duke e bindur të qëndronte.
Megjithatë, trajneri i Milanit e mohoi këtë mbrëmë: “Absolutisht jo, nuk kam qenë unë,” – tha Allegri në një konferencë për shtyp të dielën, përmes “Milan News”.
“Meritat i takojnë Claudio Filippit, i cili është një nga trajnerët më të mirë të portierëve. Po ashtu edhe klubit, që ka qenë shumë i vendosur ta mbajë atë”, vazhdoi ai.
E ardhmja e Maignan te Milani mbetet ende e pasigurt, pasi kontrata e tij skadon në qershor 2026.
Portieri i kombëtares franceze ka mbajtur gjashtë porta të paprekura në 11 ndeshje në të gjitha kompeticionet këtë sezon, duke pësuar vetëm shtatë gola./GazetaExpress/
