Ish-futbollisti i Beshiktashit, Orkan Çınar pas përfundimit të karrierës së tij në futboll, ka hapur një faqe të re në jetën e tij duke u marrë me përgatitjen e donerit në qytetin İnegöl të Bursës.
Çınar e nisi futbollin në Gjermani dhe, pasi përfundoi fazën e tij në akademi atje, filloi karrierën profesionale në vitin 2015 duke u huazuar te Gaziantepspor.
Ai kaloi një periudhë të suksesshme në këtë ekip dhe tërhoqi vëmendjen e klubeve të mëdha. Në sezonin 2017–2018 të Superligës turke, Çınar u transferua te Beshiktashi.
Futbollisti 30-vjeçar veshi për një periudhë fanellën bardhezi dhe dha një asist në ndeshjen e Ligës së Kampionëve kundër skuadrës gjermane RB Leipzig. Pas Beshiktashit, ai luajti për disa ekipe të tjera dhe e përfundoi karrierën e tij te Adanaspor, në moshën 29-vjeçare.
Duke e lënë futbollin në moshë të re, Orkan Çınar hapi një dyqan doneri rreth një muaj më parë në İnegöl dhe vazhdon jetën e tij profesionale në një sektor tjetër.
Çınar tha se u largua nga futbolli me dëshirën e tij.
Ai theksoi se, ndonëse mund të vazhdonte karrierën për edhe 10 vite të tjera, nuk e zgjodhi këtë rrugë.
“Periudhën time te Beshiktashi e kanë ndjekur të gjithë, është një nga klubet më të mëdha të Turqisë. Mund të kishte qenë më mirë, por kështu ishte fati. Doja të largohesha nga futbolli me vendimin tim. Mendoj se futbolli është një sektor ku fjalët nuk mbahen dhe nuk doja të isha më pjesë e tij. Nuk dua ta kritikoj shumë, por faktet janë të dukshme.”
Duke treguar se puna më e përshtatshme për të ishte përgatitja e dönerit, Çınar shtoi: “Kur isha në Adana, fillova ta mendoja këtë. Babai im është usta doneri prej 30 vitesh. E hapa lokalin duke u mbështetur te përvoja e tij. Po të mos ishte ai, nuk do ta kisha marrë guximin. Falë Zotit, jemi mirë në pozicionin ku ndodhemi”./Klankosova.tv
