Barcelona këtë sezon është përballur me shumë probleme me lëndime, dhe më e rëndësishmja ka qenë ajo e Lamine Yamal. 18-vjeçari u dëmtua fillimisht në ijë në shtator dhe, edhe pse tani është afër rikuperimit të plotë, ai ka vuajtur nga ky problem pothuajse tre muaj.
Lamine Yamal u kthye nga Kombëtarja e Spanjës me pubalgi, gjë që e detyroi të humbiste ndeshjet kundër Valencias, Newcastle United, Getafes dhe Real Oviedos. Ai u rikthye kundër Real Sociedad, por pas dy ndeshjeve brenda pak ditësh – ndaj Sociedad dhe Paris Saint-Germain – lëndimi iu rikthye sërish.
Kjo e bëri atë të humbiste katër ndeshjet e fundit të Spanjës, duke shkaktuar tensione mes Barcelonës dhe Federatës Spanjolle të Futbollit. Tani është zbuluar se Lamine Yamal nuk ka qenë aspak i kënaqur me mënyrën se si klubi menaxhoi rikuperimin e tij.
Sipas The Athletic, gjatë pushimit të tetorit, Lamine Yamal u ankua te Barcelona, duke bërë të qartë se nuk ishte i kënaqur me procesin e rikuperimit të drejtuar nga departamenti mjekësor i klubit, nën drejtimin e Julio Tous. Ai kërkoi të trajtohej nga pjesëtarë të tjerë të stafit, dhe kjo iu aprovua.
Lëndimi i tij është një nga 12 dëmtimet e lojtarëve të ekipit të parë këtë sezon – krahasuar me vetëm tetë në të njëjtën periudhë sezonin e kaluar. Në javët e fundit, trajneri Hansi Flick ka vendosur të kthehet te metodat e sezonit të parë në Kataluni, ndërsa kërkon zgjidhje më efektive.
Barcelona padyshim është ndikuar nga mungesat e lojtarëve kyç si Joan Garcia, Pedri dhe Raphinha. Klubi shpreson që ndryshimet e fundit në menaxhimin e rikuperimit të lëndimeve të japin rezultat, dhe javët e ardhshme do të tregojnë nëse këto masa do të funksionojnë.
