Veriu.info ka raportuar ekskluzivisht se Sistemi i Njoftimit të Shpejtë për Ushqimin i Komisionit Evropian (RASFF), ka njoftuar se në Kosovë është shpërndarë Mozzarela e kontaminuar me Aflatoksinë M1, e prodhuar nga qumësht buallice, e cila si vend të origjinës kishte Italinë.
Më shumë se 24 orë pas raportit të Veriu.info, Agjencia e Ushqimit dhe Veterinarisë ka lëshuar njoftim ku konfirmon për djathin Mozzarella të kontaminuar me aflatoksinë M1 që ja ardhur në Kosovë përmes importuesit “Premio” Sh.P.K.
AUV bën të ditur se është duke ndërmarrë masa për tërheqjen e këtij produkti nga tregu.
Komunikata e AUV:
AUV njofton opinionin për djathin Mozzarella të kontaminuar me aflatoksinë M1 prodhuar nga qumështi i buallicës
Agjencia e Ushqimit dhe Veterinarisë e Kosovës njofton opinionin publik se, përmes Sistemit të Alarmimit të Shpejtë për Ushqim dhe Ushqim për Kafshë (RASFF), ka marrë një njoftim me numër 2026.0032, lidhur me praninë e mundshme të aflatoksinës M1 në djathin Mozzarella të prodhuar nga qumështi i buallicës.
Duke u bazuar në vlerësimin e mundshëm të një rreziku serioz, Agjencia është duke ndërmarrë masat e nevojshme, në përputhje me procedurat e sistemit RASFF, për të monitoruar këtë rast dhe për të tërhequr nga tregu djathin Mozzarella nga qumështi i buallicës. Lotet e ndikuara janë: 25346, 25347, 25349 dhe 25350, me origjinë nga Italia, prodhuesi Caseificio Coop. “La Contadina” A.R.L., eksportuesi Cepparo S.P.A. Itali dhe i importuar nga Premio SHPK, Sllatinë e Madhe.
Agjencia e Ushqimit dhe Veterinarisë mbetet e përkushtuar për monitorimin e vazhdueshëm të tregut dhe zinxhirit ushqimor, duke zbatuar masa parandaluese dhe kontrolluese për të siguruar që konsumatorët në Republikën e Kosovës të kenë në dispozicion ushqim të sigurt, të shëndetshëm dhe në përputhje me standardet kombëtare dhe ndërkombëtare të sigurisë ushqimore.
Cilat janë rreziqet kur Aflatoksinë M1 gjendet në Mozzarella?
Kur Mozzarella është e kontaminuar me Aflatoksinë M1, kjo paraqet rrezik për kancer, sidomos kancer në mëlçi. Po ashtu është e rrezikshme edhe për fëmijët, sikurse që dëmton sistemin imunitar dhe ndikon negativisht në zhvillimin e fetusit të gratë shtatzëna.
